A yega un fin na plèstik desechabel na Hulanda Karibense
Hulanda Karibense ta prohibí uso di plèstik desechabel. P’esaki Saba, Sint Eustatius i Boneiru a firma un akuerdo ku Sekretario di Estado Stientje van Veldhoven (Infrastruktura i Maneho di Awa).
E intenshon ta pa, ku ayudo di Gobièrnu Sentral, pone un fin rápido na uso di plèstik desechabel na Hulanda Karibense. Pa mas tardá na aña 2021 e tres islanan ke stòp ku uso di plèstik desechabel. Esaki ta un paso importante pa tene e islanan limpi, evitá e asina yamá sòpi di plèstik i di e forma ei protehá tambe naturalesa riba i rondó di e islanan.
Palabrashon
E tres gobièrnunan insular a firma un palabrashon ku sekretario di estado Van Veldhoven pa pone un fin na uso di plèstik desechabel. Van Veldhoven: “E pòtrèt di un turtuga ku un pipa den su nanishi ta un ehèmpel famoso di kiko plèstik desechabel por hasi. E turtuganan ei ta landa akibanda, den Laman Karibe. I pa e klima tambe e paso ku nos ta dal akí ta bon; tira plèstik afó i kim’é despues di us’é un solo biaha ta simplemente un pena.”
Pa e islanan esaki ta un siguiente paso pa atendé mihó ku sushi i materia prima. Un ke otro ya a sosodé riba tereno di maneho di sushi. Konsehonan insular di Boneiru i Saba ya kaba a yega di tuma moshonnan pa pone un fin na plèstik desechabel. I boluntarionan na Saba den e simannan ku a transkurí a piki alrededor di 400 saku di sushi yen di desperdisio. Sekretario Insular di Saba Tim Muller: “Ora bo baha na Saba e promé kos ku bo ta mira ta un bòrchi ku “Saba; the unspoiled queen”. Hendenan ta bin aki pa kana keiru i profundisá den nos bunita naturalesa. Simplemente nos no por permití nos mes un sòpi di plèstik. Ta bon pa konhuntamente ku Sint Eustatius, Boneiru i Gobièrnu Sentral dal e paso konkreto akí awor pa konservá naturalesa”.
Pa Boneiru i Sint Eustatius tambe kalidat di bida di e islanan i protekshon di medioambiente ta un motibu importante pa pone un fin na uso di plèstik desechabel. E refnan di koral rondó di e islanan ta konosí pa nan bunitesa, i nan ta importante pa ekonomia. Na Boneiru so ya kaba ta tuma lugá alrededor di 500.000 buseo pa aña.
“Gobièrnu lo guia e proseso, sinembargo mester di partisipashon amplio di stakeholdernan pa logra un aserkamentu integral i duradero. Komo isla ku ta promové turismo di buseo, ekoturismo i turismo duradero, nos na Sint Eustatius tin un responsabilidat kolektivo pa logra esaki. Nos no mester sigui promové uso di plèstik desechabel, loke a keda probá di ta un menasa pa por ehèmpel nos medioambiente marino i, si e oumentá, pa nos propio eksistensia", Komisario di Gobièrnu Marcolino Franco ta bisa.
Kooperashon pa prohibí plèstik desechabel mas rápido posibel
E tres islanan denter di un aña ta traha un plan di aserkamentu pa prohibí plèstik desechabel. E idea ta pa laga e prohibishon drenta na vigor na 2021. Ministerio di Infrastruktura i Maneho di Awa ta duna un aporte finansiero, i ta suministrá ekspertisia hurídiko, por ehèmpel tokante formulashon di e reglanan nesesario pa prohibí plèstik desechabel na Hulanda Karibense. Tambe lo involukrá e eksperensianan di Hulanda Oropeo den e lucha kontra plèstik desechabel. Por pensa aki riba resultadonan di resiklahe di empakenan di material sintétiko i prohibishon di sakunan di plèstik grátis.