Van Veldhoven: sosten pa un Boneiru mas limpi

Na Boneiru na e momentunan akí ainda ta depositá 88% di e sushi. Esaki no ta bon pa medioambiente i no ta tene kuenta ku futuro. Pa yuda e isla rekohé i resiklá mas sushi separá, ta finansiá entre otro trùknan di sushi i un mashin di pèrs pa rekohementu separá di desperdisio komersial. Tambe ta mehorá rekohementu di desperdisio chikitu i peligroso, manera bateria i fèrf. Banda di esei ta investigá kon por amplia rekohementu separá di sushi di kas.

Van Veldhoven: “Depositá sushi no ta un ruta ku ta tene kuenta ku futuro. Ni pa medioambiente, ni pa un isla salú. Na Boneiru tambe nos lo traha riba un ekonomia sirkular, den kua nos ta resiklá i bolbe hasi uso di sushi mas tantu posibel. Pa loke ta trata esaki a hasi un bon komienso, ku entre otro e kayanan di medioambiente i ménos plèstik desechabel, pero ainda tin hopi kos ku mester sosodé tambe. Nos lo sigui sostené Hulanda Karibense den esaki. E trùknan di sushi, mashin di pèrs i esfuerso pa rekohementu di sushi di kas separá, na e momentunan akí ta pasonan nesesario pa un Boneiru mas limpi.”

Gezaghèber Edison Rijna di Boneiru: “E sosten ku Boneiru ta risibí di ministerio di I&W pa mehorá e maneho di desperdisio ta un ehèmpel fantástiko di koperashon entre Boneiru i Gobièrnu Sentral. Ku e aporte ku sekretario di estado Van Veldhoven a primintí, nos por dal un siguiente paso riba e kaminda pa un Boneiru limpi  i liber di sushi. Asina ta duna Selibon oportunidat pa kontribuí ku un granito importante na nos ambishon pa bira un Blue Destination. Nos ta masha agradesido na sekretario di estado Van Veldhoven pa su kompromiso."

Rekohementu separá

Riba e isla ya ta kolektá papel i karton, plèstik, glas i metal (entre otro bleki) di hopi empresa separá pa resiklahe. Pa sushi di kas e intenshon ta pa laga e kolektamentu separá akí kana mas mihó. Esaki ta eksigí por ehèmpel reorganisashon di e sentro di sushi i mas informashon spesífiko na habitantenan. Ta spera e plannan i nan ehekushon den 2021.

Fin na plèstik desechabel

Aña pasá Van Veldhoven tabata na Boneiru pa entre otro sera un sitio ilegal grandi di tira sushi i pa hasi palabrashonnan tokante ponementu di un paro pokopoko na plèstik desechabel na Hulanda Karibense entrante 2021. Na e momentunan akí ta poniendo un último man na un konsepto di ordenansa pa prohibishon di e promé sinku produktonan sintétiko pa uso un bia so.

E kampaña di konsientisashon pa esaki ta kuminsá fin di e luna akí. Ménos plèstik desechabel ta un paso importante pa tene e islanan limpi, pa evitá e asina yamá ‘sòpi di plèstik’ i asina tambe protehá naturalesa i koral rònt di e islanan.

Evitá daño na medioambiente

Ministerio di Infrastruktura i Maneho di Awa ta duna sosten na maneho di medioambiente na Hulanda Karibense (Boneiru, Sint-Eustatius i Saba). Akibou ta kai tambe, hasi e maneho di desperdisio mas duradero. Pa ehekushon di esaki a primintí un suma total di 10 mion euro na sosten finansiero pa e periodo 2013-2023. Banda di e sosten pa mihó maneho di desperdisio, ku sosten di e ministerio a traha riba rekohementu i almasenamentu responsabel di zeta sushi di mas òf ménos 30 kompania. Awor ku BOPEC, e terminal grandi di zeta, no por hasi esaki mas, Boneiru di e forma akí por evitá daño konsiderabel na medioambiente. Tambe ta duna sosten pa traha leinan ambiental moderno, ta bin un punto di informashon pa empresario i un investigashon di presensia di krema solar dañino (pa refnan di koral).