Inspekshon Hulanda Karibense: diverso i intensivo
Inspektornan di supstansia peligroso di Inspectie Leefomgeving en Transport (Inspekshon Medioambiente i Transporte, ILT) regularmente ta bula bai Hulanda Karibense. Nan ta bishitá haf, aeropuerto, negoshi logístiko, instituto di training, hospital i laboratorio pa duna informashon, tene inspekshon i entregá pèrmit. Pa motibu di e pandemia di corona a bishitá e islanan BES (Boneiru, Sint Eustatius, Saba), Aruba i Kòrsou pa último bia na 2019. Prinsipalmente, e inspektornan ta mira un profeshonalismo kresiente ora di transporta, karga i deskargá supstansia peligroso. Senior inspektor Peter Koetsier i líder di tim Willem Hoogerhout ta konta di nan trabou na e lugánan di traha spesial i yen di solo aki.
©ILTWillem Hoogerhout i Peter Koetsier
Den un tempu kòrtiku hopi diverso
Peter: “Inspekshon na e Islanan BES ta intensivo i dushi. Den un tempu kòrtiku nos ta hasi hopi diferente tipo di inspekshon. Nos ta bishitá hospital i laboratorio na e islanan. Aki nos ta chèk kon ta trata ku e produktonan residual (di corona) i nos a ekstendé pèrmit pa transporte di muestra di sanger pa e laboratorianan diverso na Hulanda Karibense. Den e hafnan nos ta chèk kon ta kùr kònteiner di tankero ku ta trese gas i petroli. Tambe nos ta bishitá e lugá di kima produkto residual na Boneiru unda ta kima produkto residual di hospital. E islanan ta meskos ku Hulanda na tamaño chikí, esei ta hasi nos trabou di inspekshon einan asina diverso i interesante.”
Bishitanan nesesario pa garantisá profeshonalismo
Willem Hoogerhout ta bishitá e islanan ya for di 2009. Promé ku esei tambe e tabata yuda train profeshonal i supervisor lokal. “ILT ta e outoridat na e Islanan BES. Nos tin un bon koperashon ku e outoridatnan di e otro paisnan outónomo den Reino, den Karibe. Nos ta den estrecho kolaborashon ku otro i ta sòru mas tantu posibel pa uniformidat den nos forma di aktua. Tambe nos ta duna un aporte na sertifikashon di negoshi na Aruba, Kòrsou i Sint Maarten. Esei ta importante pa kumplimentu ku regla den e region i den henter e kadena di transporte. Mi ta mira den e último añanan kada bes mihó kumplimentu. Tambe mi ta ripará ku presensia di nos inspektornan ta kontribuí na mantenshon di e nivel di seguridat rekerí. P’esei semper nos ta duna informashon tambe durante nos bishita na e negoshinan. E bia aki tambe tabatin un seminar di dos dia tokante Dangerous Goods (Supstansia Peligroso). Mas ku 30 hende for di sektor empresarial i 20 supervisor lokal tabata presente.”
Zuèmbruk den maleta
“E bia akí, mi maleta ta yen di ‘selftest’ i medida kontra corona”, Peter ta bisa. “Kasi tur dia mi mester hasi un tèst di PCR, pasobra mi ta bishitá diferente isla. Mi zuèmbruk tambe ta den e maleta. Den e oranan trempan di mainta hopi bia mi ta saka poko tempu pa landa buelta. Mi dianan ta largu i banda di 19.00 or ta bira skur. Tin bia hende ta pensa ku mi ta dushi drumí kantu di awa. Mare tabata asina, e anochinan ta sigui ku atministrashon i dunamentu di informashon òf konsulta ku kolega di Port State Control di ultramar ku ta traha pa ILT.”
Ròl di inspekshon
ILT ta e instansia ku ta supervisá Hulanda Karibense (Islanan BES) pa loke ta trata transporte di supstansia peligroso riba laman i den aire. Inspektornan di ILT ta bishitá e islanan por lo ménos 1 bia pa aña. Bou di e legislashon ta kai e transporte i trasbordo di supstansianan peligroso, entre nan supstansianan eksplosivo (vürwèrk), gasnan (LPG i gasnan industrial) supstansia (líkido) inflamabel (gasolín/kombustibel pa avion), supstansia venenoso (pestisida), supstansia infeksioso (muestra di sanger/produkto residual di hospital), supstansia radioaktivo (‘radionucliden’ pa uso médiko), asbesto, i bateria di litio (lithium).