Tarifanan máksimo mas haltu pa koriente i awa di bebe na Boneiru, Saba i Sint Eustatius
E tarifanan máksimo pa produkshon i distribushon di koriente i awa di bebe na Boneiru, Saba i Sint Eustatius ta subi entrante promé di yanüari 2022. E subida akí ta okashoná partikularmente pa motibu ku preis di zeta ku ta nesesario pa produsí koriente i awa di bebe a subi konsiderabel.
Autoriteit Consument & Markt (ACM) ta esun ku anualmente ta stipulá e tarifanan máksimo pa koriente pa Boneiru, Saba i Sint Eustatius. ACM ta stipulá tambe e tarifanan máksimo pa awa di bebe pa Bo21neiru i Sint Eustatius. ACM ta stipulá e tarifanan basá riba e gastunan ku produktor- i distribuidónan ta hasi. E kompanianan akí mes ta stipulá despues a base di e tarifanan máksimo akí, kiko realmente nan ta kobra e klientenan.
E preisnan di zeta inkonsebibel tin influensia grandi riba e gastunan di produkshon i komo tal riba e tarifanan (máksimo) pa koriente. Pa e motibu ei mas oumento di durabilidat di produkshon di forma enérgiko riba e islanan no ta kontribuí solamente na un mihó klima, pero hustamente tambe na tarifanan di koriente i awa di bebe mas stabil, pasobra a traves di durabilidat e dependensia di zeta ta bira ménos.
Den e añanan anterior ministerio di Asuntunan Ekonómiko i Klima i ministerio di Infrastruktura i Kalidat di Awa kontinuamente a duna supsidio na e kompanianan, di manera ku nan por a kobra e kliente tarifanan mas abou. E ministerionan a duna di konosé ku lo bai hasi esaki den 2022 tambe.
Boneiru
Pa Boneiru e tarifa di konsumo máksimo pa koriente ta subi di mas òf ménos 0,29 USD/kWh pa mas òf ménos 0,33 USD/kWh. E límite parti ariba pa e tarifa di pagabon (prepago) ta subi di mas òf ménos 0,50 USD/kWh pa mas òf ménos 0,53 USD/kWh. E subidanan aki tin partikularmente di aber ku gastunan mas haltu ku ta premirá pa produkshon di koriente. Pa konsumo di un kas di famia promedio esaki ta nifiká un subida di mas òf ménos 8 USD pa luna riba e kuenta di koriente.
E tarifa máksimo pa uso di awa di bebe ta baha di mas òf ménos 3,81 USD/m3 pa mas òf ménos 3,74 USD/m3. Pa un kas di famia promedio esaki ta nifiká un bahada di mas òf ménos 0,75 USD pa luna riba e kuenta.
Saba
Pa Saba e tarifa di uso máksimo di koriente ta subi di mas òf ménos 0,37 USD/kWh pa mas òf ménos 0,41 USD/kWh. Esaki tin partikularmente di aber ku e gastunan pa produkshon di koriente mas haltu ku ta premirá. Pa konsumo di un kas di famia promedio esaki ta nifiká un subida di mas òf ménos 9 USD pa luna riba e kuenta di koriente.
Sint Eustatius
Pa Sint Eustatius e tarifa di uso máksimo di koriente ta subi di mas òf ménos 0,32 USD/kWh pa mas òf ménos 0,36 USD/kWh. E subida akí tin partikularmente di aber ku e gastunan mas haltu ku ta premirá pa produkshon di koriente. Pa uso di un kas di famia promedio esaki ta nifiká un subida di mas òf ménos 8 USD pa luna riba e kuenta di koriente.
E tarifa máksimo pa uso di awa di bebe ta subi di mas òf ménos 6,73 USD/m3 pa mas òf ménos 8,62 USD/m3. Pa un kas di famia promedio esaki ta nifiká un subida di mas òf ménos 19 USD pa luna riba e kuenta. Un parti di e subida akí no ta okashoná solamente pa motibu di subida di preis di zeta, pero tambe pa motibu ku tabata nesesario pa hasi reparashon na e pipa di transporte.