Mi nòmber ta Sherman
Si mi pensa bèk riba mi edukashon, mi ta mira prinsipalmente mi mama. Esei tabata un palu di muhé. E la traha duru pa su yu hòmbernan i den su tempu liber semper e la trata na duna nos atenshon. Mi tata...wèl...e no tabata tei hopi. I e bia ku e tabata tei, e tabata grita. Maske kiko nos a hasi, tur kos tabata malu den su bista.
Mi no ta komprondé bon dikon e tabata rabia hopi asina. Mi mama tabata lif i tabata hari hopi, pero e tabata kambia ora mi tata tabata den kas. Mi mama tabata bira ketu, e tabata hasi su mes chikitu i semper tabata wak preokupá. E tabata koregí nos ku bos abou, ku miedu ku nos tabata un molèster pa mi tata i ku despues kos lo eskalá den gritamentu òf dalmentu.
Semper mi tabata mira e asko den su wowonan ora mi tata tabata dal nos. E no tabata por a lanta kontra mi tata i ami, ya...ami tampoko. Ainda mi stoma ta bòltu ora mi pensa bèk kon mi tata tabata dal mi mama. E ora ei mi tabatin rabia riba dje i na mesun momentu mi tabatin miedu di dje. Ora mi a bira mas grandi i a kuminsá pensa riba un relashon, mi a primintí mi mes ku ami lo hasi kos hopi diferente.
'Mi ke hasié di otro manera. Den mi famia, mi ke asumí e ròl di tata, pero mi no por logra esaki. Tur kos ku mi purba no ta sufisiente. Mi ta sinti mi mes sin balor.
Ora mi yega kas, mi ta mira mi kasá i mi yu muhé sintá den sala. Mi ta kansá. Tabata un dia largu di trabou di 12 ora. Su mirada ta bisa tur kos i mi ta sinti doló den di stoma. Promé ku mi por kita mi paña di trabou pa mi baña, e krítika duru ta kuminsá ku dikon mi no a bai kumpra kos. Mi ta trata na hasi tur kos bon, pero no ta importá kiko mi hasi. Nada ta bon. Ta hasi mi doló ora e ta insultá mi i ta bisa mi ku mi ta un tata sin balor, ku no ta kuida su famia. E ta hasi esaki pa malu, pa wak kon mi ta reakshoná.
‘Rabia, impotensia i frustrashon ta lucha pa preferensia. Mi no ke sinti esaki i mi no ke biba asina ki.’
Dikon e rechaso aki? Mi ta hasi un intento mas miéntras mi ta kana bai baño. ‘Mi lo ke kushiná awe nochi?'. Su mirada ta bisa tur kos. Mi ta sera e porta di baño mi tras. Impotensia ta triunfá riba tur otro kos ku mi ta sinti. Su reprochenan ta kibra mi.