Mi nòmber ta Shamila
Mi kurpa no ke sigui mas. Ora mi lanta para, mi pianan no por wanta mi. Asina kansá mi ta. En realidat, mi ke kai riba kama, tapa mi kurpa ku laken i yora, pero esei no ta posibel. Mi mester ta fuerte, pa mi yunan i pa mi famia. Ademas, mi tin demasiado responsabilidat na mi trabou. Mi no por laga esei bai, i mi tin un hipotek pa paga. Bon mirá, e kas tabata muchu karu i apénas mi por paga e hipotek, dor di kua mi mester a saka un fiansa pa mi outo. Awor mi ta pagando mas debe mensual. Esei ta pone ku mi ta drumi malu.
‘Hopi bia, mi yunan ta nan so na kas, pasobra mi ta na trabou hopi. Mi ta sinti mi teribel kulpabel p’esei, pero mi no sa kon otro mi mester hasi’.
Mi tin mester di e sèn hopi. Mi no ta bai pidi mi famia ayudo. Nan lo ta desapuntá den mi. Nan ta mira mi komo un muhé fuerte ku un bon trabou. Mi no ke konfrontá nan ku mi fèrdrit.
Anochi mi ta drumi malu i mainta mi ta rabia lihé i mi ta seku ku e muchanan, di kua mesora mi no ta sinti bon. Mi ta sinti bèrgwensa ku mi no ta e mama dushi ku mi ke ta.
‘Mi tin bèrgwensa di mi debenan i mi tin bèrgwensa di mi debilidat. Kon mi ta sali for di esaki, kiko mi mester hasi?’
Mi ta traha un sita ku mi dòkter di kas pa mi kehonan físiko. Kisas mi mester prek sanger un ratu, i por resolvé e kansansio ku un píldora. E dòkter di kas amabel ta yena e formulario pa prek sanger pa mi, i ta puntra mi kon ta bai na trabou i na kas. E dòkter di kas ta puntra mi pa e balanse entre trabou i mi bida privá. Mi ta kibra i konta e dòkter di kas, di mi situashon i kon mi ta sinti bèrgwensa pa esei. E dòkter di kas ta skucha mi storia trankil i ta konsehá mi pa tuma kontakto ku un trahadó sosial di Akseso. Un karta di dòkter no tabata nesesario mes. Mi por a djis bai einan.
E trahadó sosial ta tuma mi na serio i ta pone mi sinti ku ta bon ku mi t’ei. Kon nos por apoyá bo, asina e a puntra mi basta lihé. Mi tabata sinti ku mi no ta mi so pará, mas. E trahadó sosial a yuda mi traha un plan pa haña e balanse entre trabou i mi bida privá bèk, i pa hasi kosnan agradabel ku e muchanan. Asina tambe nos a partisipá den aktividat destiná pa mayor i yu serka Akseso. Nos a hasi obra di man huntu, i weganan ku ta hasi nos talento i kalidat visibel. E ta yuda nos na kas tambe, pa enfoká riba nos kalidat positivo.
Mi ta leu for di yega ainda, pero despues di un tempu hopi largu mi ta sinti ku mi ta bèk riba e bon kaminda. Danki na e komprenshon i pasenshi di e dòkter di kas i asistensia sosial.
Den kaso di kualke forma di violensia òf sospecha di violensia, bo por tuma kontakto ku:
Guiami, e konseho i punto di notifikashon di violensia doméstiko i maltrato di mucha
|