E funshonario di keho: trabou na midí serka kada keho

Ora bo tin un keho tokante ZJCN, bo por yena e formulario di keho òf manda un karta. E funshonario di keho ta duna un reakshon ekstenso por eskrito riba bo keho. E ta splika kiko e reglanan ta. Tin un término legal pa tratatamentu di un keho. Esei ta 6 siman.

E informashon no ta kla? E ora ei e funshonario di keho ta drenta den kòmbersashon ku bo. ZJCN ta wak kada bia kon por sigui drecha e servisio. Asina por ehèmpel ZJCN semper bai ta traha riba klaridat di e wèpsait. Pa asina kada asegurado por haña bon informashon.

E funshonario di keho di ZJCN ta tuma kada keho na serio i ta splika mas mihó posibel kiko e leinan i regulashon ta. E ta hasi su máksimo esfuerso pa resolvé un keho.

Tin hopi kos pa kòrda ora ta trata di un traslado médiko. ZJCN ta regla e akomodashon na e manera mas mihó posibel. Tòg e funshonario di keho di ZJCN tin bia ta haña keho tokante e akomodashon. Por ehèmpel pasobra no tin un left, siendo ku e asegurado ta den un stul di rueda. Òf pasobra no tin un kushina, siendo ku e asegurado mester di esei pa motibunan médiko. Tambe de bes en kuando ta drenta keho tokante e kamber. Por ehèmpel pasobra e kamber no ta bon limpi. E funshonario di keho ta diskutí ku e asegurado kiko e problema ta. Despues ZJCN ta drenta den kontakto ku e akomodashon pa buska un bon solushon, pa asina e estadia di e asegurado ta mas agradabel posibel.

Tin bia un asegurado ta keha pasobra e mester drumi den 1 kama ku su kompañero durante un traslado médiko. ZJCN ta regla akomodashon pa e asegurado i e persona ku ta kompañé sigun proseduranan fiho. Por sosodé ku abo i bo kompañero ta haña un kamber di dos persona standart. Bo tin un traslado médiko i bo ke bai ku un kompañero? Pues e ora ei ta importante pa pensa bon ken ta bai huntu ku bo.

E funshonario di keho ta purba splika esaki mas mihó posibel ora drenta keho tokante esaki. E ta trata kada keho ku hopi koutela.

Tin bia e funshonario di keho di ZJCN ta haña keho tokante e hòspital. Por ehèmpel tokante listanan di espera largu. Òf pasobra e asegurado kada pasa tres luna ta bolbe haña un otro spesialista médiko. Lástimamente no ta tur dòkter por ta presente henter aña. Bo tin keho tokante e hòspital? E ora ei e funshonario di keho di ZJCN ta referí bo pa e departamento di keho di e hòspital. E departamento aki ta sigui atendé ku e keho.

Tin bia e funshonario di keho di ZJCN ta haña keho tokante e transporte durante un traslado médiko. Por ehèmpel tokante e buelo. Tin bia, aseguradonan ta bula ku un avion chikitu. Nan ta haña inkómodo pa biaha asina. Òf nan tabata ferwagt un avion mas grandi. Pero prinsipalmente for di Islanan Ariba generalmente no ta posibel pa hasi un traslado médiko ku un avion grandi. Tin palabrashonnan tokante  e dianan ku ta bula i e tipo di avion.

Durante e buelo tin bia bo mester hasi un paro riba otro isla pa buska òf pa baha otro aseguradonan. Tin bia, aseguradonan ta haña esaki laf. ZJCN tin proseduranan fiho pa e buelonan pa por regla e kuido mas efisiente posibel. P’esei bo no por skohe e dia,e buelo òf e ruta bo mes.

Tambe sa drenta keho tokante e transporte riba e destinashon. ZJCN solamente ta regla transporte entre e aeropuerto, e hotèl, i e hòspital. Si e asegurado ke transporte –  por ehèmpel pa un pakus –  e mes mester regla i paga esaki.

E funshonario di keho ta purba splika mas mihó posibel kiko e reglanan legal ta. ZJCN mester ten’e na e reglanan aki.

Tin bia aseguradonan mes ke skohe unda nan ta haña e trato médiko. Por ehèmpel na Hulanda, òf  na Colombia. De bes en kuando e funshonario di keho di ZJCN ta risibí keho tokante esaki. Si por duna e kuido por ehèmpel na Boneiru, Aruba òf Kòrsou, bo no por bai Hulanda. Esaki ta e reglanan legal ku ZJCN mester ten’e na dje. Mas serka di kas hopi bia ta mas agradabel tambe pa e asegurado. E no tin nodi di biaha asina largu.

Tambe tin bia hende ke pasa mas tempu durante nan traslado médiko ku loke ta un nesesidat médiko. Por ehèmpel, pa nan por tin un fakansi tambe. Lástimamente, esaki no ta posibel. Bo por haña un kompensashon solamente pa e dianan riba kua bo mester di tratamentu médiko.

E funshonario di keho ta hasi tur loke ta posibel, pero e mester ten’e na e legislashon RAZ BES tur ora. E Regeling Aanspraken Zorgverzekering BES (Areglo Derecho di Demanda Seguro di Kuido BES).

Tin bia e funshonario di keho di ZJCN ta haña keho tokante e kompensashon di estadia. Por ehèmpel, ora dura un tiki mas largu promé ku transferí e kompensashon di estadia. Den kaso di un traslado médiko inesperá, tin bia e asegurado mester sali su siguiente dia kaba. E ora ei ZJCN ta transferí e kompensashon di estadia mas pronto posibel riba kuenta di banko di e asegurado. Pero tin bia algun dia ta pasa promé ku e kompensashon di estadia ta riba e kuenta. Esaki ta dependé, por ehèmpel, di e kuenta di banko.

Tin bia tin keho ta drenta tokante esaki. E ora ei e funshonario di keho ta purba splika pakiko tin bia por dura un ratu promé ku pasa e kompensashon di estadia riba e kuenta. Pues, sòru pa semper ZJCN tin bo informashon (bankario) korekto!