Bo a bira malu den eksterior? Esaki ta loke bo mester sa
Ora bo ta den eksterior temporalmente i di forma inesperá bo mester risibíasistensia médiko, den algun kaso, un kompensashon for di bo seguro di ZJCN ta posibel.
Na ki momentu bo ta sigurá?
Bo ta sigurá kontra asistensia médiko di emergensia den eksterior, ora:
- E situashon ta asina severo i agudo ku bo no por warda te ora bo ta bèk riba bo isla di residensia.
Paga tinu: lo sigurá solamente e promé tratamentu agudo. E tratamentunan ku ta sigui i otro kuido no ta kai bou di e kobertura aki.
Kiko lo no kompensá?
E seguro nó ta kubri gastu hasí pa:
- Keho ku no ta urgente (manera un bishita na un dòkter di kas òf un botika),
- E biahe di buèlta òf un estadia mas largu pa motibu di malesa,
- Repatriá den kaso di fayesimentu,
- Pèrdida di ekipahe òf artíkulo balioso.
Kiko bo mester hasi den kaso di un situashon di emergensia den eksterior?
- Mèldu e situashon di emergensia mas pronto posibel bo mes na ZJCN (òf laga un hende hasi esei na bo nòmber) via info@zorgverzekeringskantoor.nl òf yama e number di telefòn +599 715 8899 (Boneiru), +599 318 3379 (Sint Eustatius), +599 416 3552 (Saba).
- Sòru pa ZJCN risibí un karta médiko ku ta demonstrá e urgensia.
- E tim médiko di ZJCN lo evaluá e situashon i notifiká bo via meil si lo kompensá e kuido.
Kon e kompensashon ta funshoná?
- Bo mes ta paga e gastunan di kuido promé.
- Despues bo por deklará e gastunan na ZJCN.
- E kompensashon máksimo ta igual na e tarifa usual pa e kuido aki na bo isla BES. Na momentu ku e tarifa ei no ta disponibel, lo buska un tarifa adekuá denter di e merkado hulandes.
Paga tinu: lo no duna bo un karta di garantia, ni paga un forskòt, i bo no tin derecho riba un kompensashon di estadia.
Bo a haña asistensia médiko i e tabata un kaso di emergensia? E ora ei ZJCN por kompensá e gastunan bou di sierto kondishon.
Bo ta hasi bo deklarashon di gastu sigun e prosedura, ún biaha so, ku entrega di tur faktura pareu. Bo por entregá bo deklarashon via e formulario di deklarashon.