Kuido paramédiko

Fisioterapia i terapia di ehersisio Cesar i Mensendieck

Fisioterapia i terapia di ehersisio ta dirigí riba sanashon, bahamentu di doló, òf mantenshon di un estado físiko mas mihó posibel. Pa fisioterapia i terapia di ehersisio bo tin mester di un referensia di un dòkter di kas òf un spesialista.

Pa mucha te ku 17 aña ta kompensá e promé 9 tratamentunan pa un aña kalendario. Si esaki no ta sufisiente, e dòkter ku ta referí por entregá un petishon di kontinuashon pa 9 tratamentu mas den e mesun aña. E total pa aña pues ta un máksimo di 18 tratamentu.

Pa aseguradonan di 18 aña òf mas lo kompensá fisioterapia den kaso di enfermedatnan ku ta riba e lista limitativo. E promé 20 tratamentunan no ta bini na remarke pa kompensashon. Por haña e lista den e Regeling aanspraken zorgverzekering BES, paragraf 4, artíkulo 1.4.2. Pa algun enfermedat a stipulá un periodo máksimo. Bo terapista por informá bo tokante esaki.

Pa kompensashon di fisioterapia i terapia di ehersisio bo dunadó di kuido mester pidi pèrmit adelantá na ZJCN.

Logopedia

Aseguradonan tin derecho riba logopedia ku e meta kurativo di restorá òf mehorá nan abla. Pa esei bo tin mester di un referensia di un dòkter di kas, un spesialista òf un dentista. No ta kompensá logopedia pa metanan ku no ta kurativo (por ehèmpel disleksia, papia den públiko òf entrenamentu di kanto).

Pa kompensashon di logopedia mester tin pèrmit adelantá di ZJCN.

Èrgoterapia

Èrgoterapia ta promové òf restorá e kuido propio i e abilidat di yuda bo mes dor di siña hende pa bolbe hasi nan aktividatnan diario mas mihó. E èrgoterapeuta ta duna konseho, instrukshon, entrenamentu òf tratamentu den su kamber di tratamentu òf na kas. Pa èrgoterapia bo tin mester di un preskripshon di un dòkter di kas, un spesialista, òf un dòkter di kas di kuido. E ora ei bo tin derecho riba un máksimo di 10 ora di tratamentu pa aña.

Konseho dietétiko

Informashon i konseho tokante nutrishon i kustumbernan di kome ku un meta médiko bo por haña serka un dietista. Pa esaki bo tin mester di un preskripshon di un dòkter òf un dentista. E ora ei bo tin derecho riba maksimalmente 3 ora di tratamentu pa aña.

Podoterapia

Podoterapia i sole terapéutiko tin komo meta pa redusí òf para kehonan di pia. Pa esaki bo tin mester di un preskripshon di un dòkter di kas òf un spesialista médiko.

Pedikür médiko

Un pedikür médiko ta enbolbí ku kuido (spesialisá) di pia i tratamentu di malesa di kueru i di uña. Solamente aseguradonan ku diabétis tin derecho riba tratamentu di un pedikür médiko. Bo dunadó di kuido mester pidi ZJCN pèrmit adelantá.

Programa pa stòp di huma

Aseguradonan por partisipá den un programa pa stòp di huma preskribí pa un dòkter di kas òf un spesialista. Aki ta trata di asistensia médiko i, si ta nesesario, farmaséutiko ku ta inkluí den e Kwaliteitsregister Stoppen met Roken (Registro di Kalidat Stòp di Huma). Bo por sigui un programa pa stòp di huma ku un máksimo di 1 biaha den un aña kalendario. Bo mester tin pèrmit adelantá di ZJCN pa esaki.

Intervenshon kombiná den estilo di bida

Pa aseguradonan di 18 aña òf mas por kompensá kuido preskribí pa un dòkter di kas òf un spesialista den kaso di intervenshon kombiná den estilo di bida (GLI). GLI ta un programa di dos aña ku ta dirigí riba kome mas saludabel (ménos konsumo di energia), move mas, i riba sosten sikológiko pa kambio di komportashon. Por sigui un programa di GLI un máksimo di 1 biaha pa 24 luna. Na momentu ku no sigui e programa kompleto, lo kompensá solamente un parti.

Pa kompensashon di partisipashon den un programa di GLI bo tin mester di pèrmit adelantá di ZJCN.