Maneho di kontrakt 2021-2025
MANEHO DI KONTRAKT 2021 – 2025 ASEGURO DI KUIDO BES
E Direktorado di programa Zorg en Jeugd Caribisch Nederland (ZJCN) di e ministerio di Salubridat, Bienestar i Deporte (VWS) ta responsabel pa e ehekushon di e seguro di kuido riba e islanan di Boneiru, Sint Eustatius i Saba (BES). ZJCN ta para pa realisashon di e lema di VWS riba e islanan BES: ‘Kuido pa hende den un komunidat salú’. ZJCN ta hasi esaki di un forma hustu, efisiente i transparente. E maneho di kontrakt di ZJCN pa e periodo 2021-2025 ta indiká kuadro i liñanan di guia pa kontraktá diferente tipo di dunadó di kuido pa e periodo 2021-2025. Ku nos maneho di kompra nos ta informá bo tokante kiko bo por spera di nos den kuadro di e maneho di kontrakt i kiko nos ta pidi di bo komo dunadó di kuido. Nos ta spera ku, huntu ku bo, nos por yega na akuerdonan ku ta kondusí na e mihó kuido, awor i den futuro.
GARANTIA I AKSESIBILIDAT
Nos aseguradonan tin derecho riba kuido ‘in natura’. Esei ta nifiká ku aseguradonan di ZJCN por, sin paga, risibí kuido sigurá konforme e Besluit zorgverzekering (Resolushon seguro kuido médiko) BES i e areglo derivá for di esaki Regeling aanspraken zorgverzekering (Areglo demanda seguro kuido médiko) BES. Pues aseguradonan no tin ku paga e dunadó di kuido pa e kuido aki. Ademas ZJCN ta regla rekesito atministrativo ku esaki ta trese. P’esei ZJCN ta sera akuerdo kontraktual ku dunadó di kuido, tantu profeshonal individual komo instansha. ZJCN no ta sera akuerdo ku kada dunadó di kuido, pero mester kontratá sufisiente dunadó di kuido di moda ku aksesibilidat di e kuido pa aseguradonan di BES ta garantisá. Pa e kuido ku no ta disponibel riba e islanan BES, ZJCN ta sera akuerdo ku dunadó di kuido pafó di e islanan BES.
KOMPETENSIA DI KÒNTRÒL
ZJCN ta evaluá si kada dunadó di kuido ta kumpli ku e eksigensianan stipulá den lei pa loke ta trate e kompetensia pa ehersé su profeshon médiko. Dòkter, dentista, frumú i botikario mester disponé di un eksonerashon manera stipulá den e Besluit uitoefenen medisch beroep BES (Resolushon ehersementu profeshon médiko BES). Ta responsabilidat di e dunadó di kuido pa kumpli ku eksigensia legal pa establesementu. No kumpli ku e eksigensia ta un motibu pa para e kontrakt di kuido òf pa keda sin ser’é.
KALIDAT & EFIKASIA
Ademas di e eksigensianan legal pa establesementu i kualifikashon di dunadó di kuido, komo ZJCN nos ta empeñá pa kumpra kuido di kalidat i efikasia haltu, ku ta kuadra ku e presupuesto di ZJCN ku VWS ta stipulá kada aña. P’esei tin eksigensia di kalidat general na vigor, kua ta stipulá den e Algemene Inkoopvoorwaarden di ZJCN. Pa kada dunadó di kuido ta konta eksigensianan di kalidat spesífiko tambe. Esakinan ZJCN ta diskutí ku e dunadónan di kuido i nan ta stipulá den kontrakt di kuido entre e dunadó di kuido i ZJCN. Eksigensianan di kalidat importante ku ZJCN ta stipulá pa e dunadó di kuido ta, por ehèmpel, registrashon den un registro di kalidat rekonosé di e dunadó di kuido, siguimentu di kurso di rekapasitashon periódiko dor di e dunadó di kuido, i si e ofisina di e dunadó di kuido ta aksesibil i alkansabel. ZJCN ta evaluá dunadó di kuido nobo i kontraktá a base di e indikativo di kalidat vigente. Ku esaki ZJCN ta haña kriterio di e kalidat i e efikasia di e kuido brindá. ZJCN ta tene kuenta ku e kriterionan aki den kompra di kuido, ku kua no ta ekskluí kompra selektivo. Durante kompra di kuido selektivo nos ta sera akuerdo solamente ku dunadó di kuido ku ta kumpli ku nos eksigensianan di kalidat i efikasia.
KUIDO NO KONTRATÁ
Si un dunadó di kuido ta ofresé kuido ku no ta inkluí den e Regeling aanspraken zorgverzekering BES (Areglo demanda seguro kuido médiko BES), e dunadó di kuido no por deklará e kuido aki serka ZJCN. Si tòg duna e kuido aki, e dunadó di kuido mes lo para responsabel pa gastu ku esaki ta trese. Ademas, ZJCN no ta sera akuerdo di kuido ku kada dunadó di kuido. Asina ku un asegurado tin intenshon di tuma kuido serka un dunadó di kuido no kontratá, e asegurado mester pidi pèrmit serka ZJCN. Si tin sufisiente otro dunadó di kuido disponibel ku ta ofresé e mesun kuido i ku, a base di indikashon manera kalidat i efikasia tin un kontrat ku nos, ZJCN lo desaprobá e petishon aki. Si e asegurado a haña pèrmit di ZJCN, e asegurado por risibí kuido di un dunadó di kuido no kontratá. Den un situashon asina e asegurado, en bes di derecho riba e fasilitashon tin derecho riba e kompensashon total òf parsial di e gastunan hasí pa e kuido aki. Esaki ta menshoná den artíkulo 10.4 di e Besluit zorgverzekering BES (Resolushon seguro kuido médiko BES).