Ta buska mayor di kriansa

Siman pasá, Kuido pa Hóben Hulanda Karibense a inísia un kampaña na Boneiru, Saba i Sint Eustatius enbuska di mayor di kriansa. Ku e kampaña, Kuido pa Hóben ta spera di por akumulá mínimo 20 famia di kriansa nobo. Esaki ta hopi nesesario komo ku e kantidat di famia di kriansa ta tiki. Esaki ta pone ku e muchanan ta keda pa un tempu largu riba lista di espera innesesariamente.

Kuido pa Hóben no ta buska solamente mayor di kriansa fultaim pa algun luna te ku algun aña, pero tambe mayor di kriansa pa por ehèmpel (mitar) dia den siman, den wikènt, of durante fakansi di skol. Tur e tiponan di kriansa temporal aki ta hasi un diferensia pa un mucha.

Tambe kier bira mayor di kriansa? 
Bo tin 21 aña, bo ta fuerte pará den bo sapatu i bo por ofresé un mucha amor, struktura i seguridat? E ora ei, konsiderá pa bira un mayor di kriansa. E kriansa temporal ta rekerí hopi, pero lo bo risibí hopi a kambio. Den e kampaña di Kuido pa Hóben, bo por mira esaki klaramente serka mayornan di kriansa ku eksperensia:

“Mi ta mama di kriansa pasó nos muchanan ta nos futuro di mañan. Kada simia ku nos por planta den nan bida, lo duna bon fruta. Tin momento ta mas difísil ku otro, debí na loke mi yu di kriansa a pasa aden. Pero ora mi mira e sonrisa riba su kara i mira ku e por ta su mes, mi ta kòrda pakiko mi ta hasi’é.”

Mayornan di kriansa ta risibí ayudo
Mayornan di kriansa ta risibí guia i apoyó serka Kuido pa Hóben. Lo traha un plan di akshon i lo konsultá frekuentemente ku e profeshonal di Kuido pa Hóben, i si ta posibel, ku e mayornan biológiko. Lo rekompensá e gastunan ku e mayornan di kriansa tin pa ku kuido di e yu di kriansa. E montante di kompensashon ta dependé di e edat di e yu di kriansa.

Mas informashon?
Pa mas informashon òf pa un foyeto tokante kuido di kriansa, tuma kontakto ku Kuido pa Hóben Hulanda Karibense:

E-mail: info.jgcn@jeugdzorgcn.com

Boneiru: (+599) 715 7201

Saba:  (+599) 416 3718/416 3819  

Sint Eustatius:  (+599) 318 3104/318 3105