Kooperashon FCB i ZJCN pa konstrukshon di edifisio nobo pa ‘biba bou di guia’
E asosashon di konstrukshon di kas, Fundashon Cas Bonairiano (FCB) i ministerio di Salubridat, Bienestar i Deporte (VWS) ta bai traha konhuntamente kasnan nobo pa un fasilidat di biba bou di guia pa hóben na Boneiru. Riba 11 di mart direktor Ben Oleana (FCB) i Sekretario General suplente Abigail Norville (VWS) a firma e kombenio di kooperashon.
Den e fasilidat na Boneiru ta duna guia na hóben di Hulanda Karibense entre 16 i 24 aña pa nan bira mas independiente. E hóbennan akí a pasa den un trayekto di ayudo di durashon largu, pero ku pa motibu di e situashon na kas ku no ta kambia, no por biba mas na kas. Pa e grupo akí ta realisá e fasilidat di bibienda.
Piloto
E kooperashon ta sigui despues di un proyekto piloto di biba bou di guia, ku a inisiá aña pasá. A usa e aña ku a transkurí pa perpetuá e fasilidat. Esei a logra hopi bon i a keda koroná ku un evaluashon positivo di Inspekshon di Salubridat i Hubentut (IGJ).
Na e momentu akí e fasilidat di biba bou di guia ta alohá den un kompleho di apartamento ku ta hür na Kaya Sabana. Pa logra ku kontinuashon di e fasilidat ta struktural, VWS awor a sera un kombenio di kooperashon ku Fundashon Cas Bonairiano.
Kombenio
Den e kombenio a hasi entre otro palabrashon tokante konstrukshon i finansiamentu di e alohamentu nobo, palabrashon tokante ‘bruikleen’ i tokante e fluho di hóben pa kasnan di hür sosial di Fundashon Cas Bonairiano. Partikularmente e último akí ta hopi importante pa trayektonan di independisashon eksitoso, pa motibu ku si tin garantia di fluho e fasilidat ta mantené su derecho di eksistensia i hóbennan di Hulanda Karibense ta haña oportunidat real pa konstruí un propio bida independientemente.
Ta bai konstruí e edifisio nobo na Kaya Mendelssohn i e lo bai brinda espasio na 12 hóben. Den e diseño a tene kuenta ku e posibilidat pa eventualmente ekspandé den futuro. E fecha di entrega di e edifisio nobo ta planiá pa mei 2023.