Ta lansa telefòn pa hubentut ‘Guana Chat’ na Sint Eustatius
Riba 16 di mart ta lansa e telefòn pa hubentut ‘Guana Chat 918’ na Sint Eustatius. E liña di ayudo aki ta pa tur mucha i hóben entre 8 te 21 aña na Sint Eustatius. Ta un liña di ayudo telefóniko pa mucha i hóben ku ta buska informashon riba tur sorto di tópiko ku nan tin pregunta. Yamada na e servisio akí ta grátis i anónimo.
E liña di ayudo Guana Chat ta un koperashon entre e ministerionan di Salubridat, Bienestar i Deporte (VWS) i Asuntunan Interno i Relashonnan den Reino (BZK), Entidat Públiko Sint Eustatius i Telefòn pa hubentut di Aruba, ‘Telefon pa Hubentud’. E personanan ku ta kontestá telefòn ta boluntarionan ku a sigui un formashon adekuá i ku a risibí tambe un treinen kultural amplio di e tim di aporte sosial di trahadó sosial na Sint Eustatius. Hóbennan por papia ku e boluntarionan entrená akí tokante kualkier problema, reto òf pregunta ku nan tin. Of simplemente kompartí un eksperensia.
Sekretario di Estado Van Ooijen (VWS): “Ta fantástiko ku awor tin e liña di ayudo akí.Ta hopi importante ku mucha- i hóbennan por akudí un kaminda ora nan ta preokupá òf tin pregunta. Un orea ku ta skucha tin bia ya kaba por hasi un diferensia grandi. Mi speransa ta ku di e forma akí ta bira mas usual pa papia tokante esaki ora algu ta molestiá bo. Ku e tipo di fasilidatnan aksesibel akí nos kier kontribuí na salú mental di hóbennan den henter Reino.”
For di 16 di mart e number di telefòn grátis 918 ta tur dia alkansabel entre 2 or i 6 or di atardi. E wèpsait www.guanachat918.com ta duna informashon tokante kon pa usa e liña di ayudo i diferente tópiko ku hóbennan kier papia riba dje. E tim di aporte sosial di Entidat Públiko Sint Eustatius i Mega D Youth Foundation lo bishitá skol sekundario i tur grupo 5 t/k 8 di skolnan básiko na Sint Eustatius pa informá e alumnonan tokante e liña di ayudo akí i duna nan guia pa medio di e wèpsait.