Biba Bou di Guia ta selebrá un aña di eksistensia
E proyekto Biba Bou di Guia (Begeleid Wonen) a selebrá su promé aña di eksistensia riba djamars 15 di mart. E proyekto piloto di dos aña a habri su porta riba 15 di mart 2021. Hóbennan vulnerabel di 16 te ku 23 aña ku pa tempu largu ta den un trayekto di yudansa serka Jeugdzorg i ku mester dal un siguiente paso pa bira mas independiente, ta keda den un kas komun.
Biba Bou di Guia tin kapasidat pa 10 hóben. Entre mart 2021 i febrüari 2022, a aloká un kantidat di 8 hóben. Un di e hóbennan tabata un alokashon di krísis. E hóbennan a sigui un trayekto di guia den un ambiente strukturá, asina yama ACA metódiko (ACA Methodiek) (guia, coaching i duna konseho).
Biba Bou di Guia ta traha huntu ku diferente organisashon di guia ku ta den e kadena sosial, pa asina nan por ofresé guia spesífiko na e muchanan. Solange Martilia, koordinadó di Biba Bou di Guia: “E kooperashon ku e otro organisashonnan sosial, a hunga un ròl importante den e trayekto di independensia di e hóbennan. Kada un di e profeshonalnan a duna un man segun nan área di konosementu. Sin otro, e kooperashon den kadena, no lo a logra hasi e promé aña di Biba Bou di Guia eksitoso. Nos ta agradesido pa e kooperashon ku nos partnernan di kadena i nos ta spera ku esaki lo sigui pa den futuro
“E akuerdo firmá riba 11 di mart último entre Fundashon Cas Bonairiano (FCB) i VWS (Ministerio di Salubridat, Bienestar i Deporte), ta un desaroyo importante pa Biba Bou di Guia, komo ku esaki ta sigurá un transferensia di alohamentu pa e hóbennan na final di nan trayekto”, segun Solange.