A instalá Komishon di konseho tokante Keho pa Kuido i Hubentut Hulanda Karibense (ZJCN)

Entrante promé di novèmber 2022 a instalá un Komishon di konseho tokante keho independiente i eksterno, pa duna konseho riba evaluashon di kehonan di habitantenan di Hulanda Karibense relashoná ku kuido òf kuido di hubentut.

Klachtadviescommissie
Di robes pa derechi: Pierre Perigault Monte, Maartje Molenaar, Astrid McKenzie-Tatem, Frits Goedgedrag, Filia Kramp

Dikon e komishon di konseho tokante keho akí?

Kuido i Hubentut Hulanda Karibense (ZJCN) di ministerio di VWS ta responsabel pa kuido i kuido di hubentut na Hulanda Karibense. ZJCN ta konsiderá importante ku ta atendé keho di habitantenan kontra ZJCN di forma kouteloso. E aktual funshonario di keho di ZJCN ta atendé tur keho ku drenta. E funshonario di keho ta wak si bo keho ta atmisibel i lo tuma e keho komo tal den tratamentu. Entrante promé di novèmber lo hasi un agregashon importante na e prosedura di keho eksistente. Den algun kaso por pidi e komishon di konseho tokante keho independiente pa duna konseho riba evaluashon di un keho.

Ken ta sintá den e komishon di keho?

ZJCN ta konsiderá nesesario ku e komishon di konseho tokante keho ta bon na altura di e situashon riba e islanan i nan habitantenan. Pa e motibu ei ta preferá pa e miembronan di e komishon ta bin di e region, di manera ku nan konosé e kultura- i sirkunstansianan di Hulanda Karibense.

A publiká un vakatura riba kua personanan por a reakshoná. Finalmente a selektá 5 miembro ku sekretario di estado di VWS a nombra. E miembronan akí ta:

Presidente F. Goedgedrag (anterior gobernador di Antia Hulandes), presidente suplente D.C. Kramp, miembronan A. McKenzie-Tatem, P. Perigault Monte i M. Molenaar.

Ningun di e personanan akí no ta traha na ZJCN; nan por konsehá kompletamente independiente. E nombramentu ta na vigor pa un periodo di 4 aña, ku posibilidat pa prolongá e periodo aki dos bia. E komishon mes ta determiná su forma di traha.

Denter di poko ta publiká un reglamentu den kua ta stipulá esaki. ZJCN ta suministrá si e sekretario ofishal, ku ta sostené e komishon di keho. Desishon di instalashon Komishon di Keho Kuido i Hubentut Hulanda Karibense.

Ki ora ta pidi yudansa di e komishon di kuido?

Ora ZJCN risibí un keho pa kua ta pidi un evaluashon, e por pidi yudansa di e komishon di konseho tokante keho. E direktor di ZJCN ta disidí ki ora ta pidi e komishon pa atendé un keho pa duna konseho. No t’asina pues ku e denunsiante mes por skohe pa e komishon di konseho tokante keho atendé su keho.

Kiko un habitante ta ripará di e trabou di e komishon di konseho di keho?

Ora e komishon di konseho tokante keho atendé un keho, e lo organisá un oudiensia. Durante e oudiensia akí e komishon lo skucha denunsiante i akusado. Despues ku e komishon a kolektá informashon di e forma akí riba e keho i e defensa kontra esaki, e lo emití un konseho. E ta manda e konseho akí pa e direktor di ZJCN. E direktor konsekuentemente ta disidí riba e keho. E denunsiante ta risibí un karta al respekto, den kua ta inkluí tambe e konseho di e komishon di konseho tokante keho komo anekso.