Simposio Tratado Hèndikèp di Nashonnan Uní ta krea konsientisashon pa derecho di hende ku un limitashon na e islanan di Hulanda Karibense
Djabièrnè dia 3 di novèmber, e Simposio Tratado Hèndikèp di Nashonnan Uní a tuma lugá den Hòfi Kultural na Boneiru. Enfoke di e evento, organisá pa Zorg en Jeugd Caribisch Nederland (ZJCN, Kuido i Hubentut Hulanda Karibense), un parti di e Ministerio di VWS (Salubridat, Bienestar i Deporte), den kolaborashon ku Tara bv, tabata oumento di konsientisashon i desaroyo di un programa di akshon mutuo pa derecho di hende ku un limitashon na e islanan di Hulanda Karibense.
E simposio a trese un grupo diversifiká di hende huntu pa papia tokante e Tratado Hèndikèp di Nashonnan Uní na Hulanda Karibense. Representantenan di ‘College rechten van de mens’ (Kolegio pa derecho humano), organisashon di interes ‘Ieder(in)’, e punto di konseho 'Niets over ons zonder ons', e Ministerio di Asuntunan Interno i Relashonnan den Reino, i Asosiashon di Atletismo Prins Hendrik a kompartí nan esfuerso riba tereno di aksesibilidat i partisipashon.
Hende ku un limitashon na Hulanda Karibense ainda ta eksperensiá muchu hopi biaha ku ta ekskluí nan for di asuntu diario, loke ta stroba nan partisipashon total den sosiedat. Ministerio di VWS tin un papel klave den implementashon di e Tratado Hèndikèp di Nashonnan Uní na e islanan di Hulanda Karibense, ku un enfoke riba stimulá inisiativa, uni partidonan, komunikashon pa konsientisá, i promoshon di desaroyo di konosementu i ekspertisio di eksperensia. Inklushon di hende ku un limitashon den e proseso di ratifikashon di e Tratado Hèndikèp di Nashonnan Uní pa Hulanda Karibense ta krusial, ku e prinsipio "Niet Over Ons Zonder Ons" komo guia.
Puntonan kulminante di e simposio
Un punto kulminante di e evento tabata proyekshon di un sine impreshonante, trahá dor di sineasta Casimir Roosje, ku a mustra bida di hende ku un limitashon na e islanan di Hulanda Karibense. E sine a enfatisá e papel krusial di derecho humano i importansia di e Tratado Hèndikèp di Nashonnan Uní. Despues, Marieke Knol i Mimoun Himmit a presentá un rapòrt ku un eksplorashon di derechonan di persona ku un hèndikèp na e islanan di Hulanda Karibense. Den e rapòrt aki, nan a hasi sinku rekomendashon importante:
P - Traha un programa tokante tur artíkulo di e tratado, komo outoregulashon.
E - Oumentá uso di ekspertisio di eksperensia di hende ku un limitashon.
A – Djòin e akshon kontra pobresa.
C - Start un kampaña pa oumentá konsientisashon.
E – Traha huntu ku Alliantie Nederland.
Despues di e presentashon, alrededor di 50 profeshonal i eksperto di eksperensia presente a bai den kòmbersashon pa identifiká prioridatnan i ‘quick win’ (logro rápido) riba diferente dominio di bida manera trabou, entrada, aktividat den tempu liber, kuido, enseñansa, bibienda, i aksesibilidat. Lo kompilá resultado di e diskushon aki i inkluí esaki den e akshon ku ta sigui.
Herbert Barnard, direktor di ZJCN, a sera e simposio pa medio di wak bèk riba un dia fruktífero. Durante e klousura a revelá un pintura di e artista señor Pinto. E pintura aki a anunsiá un ekpsosishon ku for di dia promé di desèmber lo por bishitá na Galerie Sobremesa. Na mes momentu, esei a marka e señal pa kuminsá pèrkurá pa hende ku un limitashon por tuma parti di forma ekivalente na Hulanda Karibense, ku e Tratado Hèndikèp di Nashonnan Uní komo su guia.
E sine ku a mustra durante e simposio ta disponibel riba e wèpsait https://www.hofikultural.com/new-blog/2023/11/6/watch-our-mini-documentary-about-un-convention-handicap pa interesadonan.