Ehersisio di pre-evakuashon médiko riba seis islanan den Reino
Riba djabièrnè 2 di yüni a tuma lugá un ehersisio, den kua e 6 islanan di e parti karibense di Reino a partisipá. Meta di esaki tabata pa praktiká pre-evakuashon di pashèntnan di Saba, Sint Eustatius i Sint Maarten den kaso di un krísis di orkan.
E responsabilidat prinsipal pa kontinuidat di kuido pa e islanan BES ta asigná na Kuido i Hubentut Hulanda Karibense (ZJCN) di ministerio di VWS. Komo ku ta eksistí un dependensia geográfiko entre Saba, Sint Eustatius i Sint Maarten, e kooperashon ei a forma e base di e ehersisio akí ku desviashon pa e islanan abou.
Diferente instituto médiko i órganonan di gobièrnu riba e seis islanan a partisipá na e ehersisio. Nan ta Fundashon Mariadal (Boneiru), Sint Maarten Medical Center (Sint Maarten), Horacio Oduber Hospital (Aruba), Curaçao Medical Center (Kòrsou), Queen Beatrix Medical Center (Sint Eustatius) i SabaCares (Saba). Ministerio di Salú Públiko, Desaroyo Sosial i Labor di Sint Maarten, e ministerionan hulandes BZK i VWS, i Representashon di Hulanda na Aruba, Kòrsou i Sint Maarten tambe tabata representá a base di nan propio responsabilidat den kaso di pre-evakuashon médiko.
Na 2022 sekretario di estado di VWS i e ministernan di salubridat di e paisnan a disidí di amplia e kooperashon médiko i práktika entre e islanan. Un di e partinan importante di e kooperashon ei ta trata pre-evakuashon médiko. Pre-evakuashon médiko ta esensial den kaso di un (menasa di) krísis pa por garantisá kontinuidat di kuido, ora e ta na peliger den ora e siguridat físiko ta ser afektá (manera den kaso di un orkan). Òf den kaso ku un krísis kousa skarsedat na rekursonan i/òf personal médiko disponibel.
Historia ta siña nos ki impakto un orkan por tin riba poblashon di e isla. E ehersisio akí ta un stap importante pa ta mihó prepará durante temporada di orkan i pa fortalesé e kooperashon entre tur e islanan den Reino, ku den kaso di krísis hopi bia ta dependé di otro.