Mihó kolaborashon i kalidat di kuido pa hóben na Hulanda Karibense ku palabrashon atministrativo
Ayera 7 di yüni 2023 a firma palabrashonnan atministrativo ku kua ta regla kuido pa hóben na Hulanda Karibense mas mihó. Sekretario di estado van Ooijen (VWS) i diputado Kroon (Boneiru), Komisario di Gobièrnu Sentral Francis (Sint Eustatius) i diputado Heyliger (Saba) a firmá e palabrashonnan pareu na Sint Eustatius, Boneiru i Saba. Ku e palabrashonnan aki ta klarifiká repartishon di responsabilidat pa kuido pa hóben, ta mehorá e kolaborashon i garantisá un mihó kalidat di kuido pa hóben.
Sekretario di Estado van Ooijen:
“Kada mucha mester por krese salú i seif, tur kaminda den Reino. Durante mi promé bishita mi a mira i skucha kon duru instansianan lokal ta traha na esaki. Ku e palabrashonnan aki mi ke fortifiká e base, pa asina e islanan tin mas posibilidat pa duna mucha, hóben i famia e kuido i asistensia ku e tin mester."
Repartishon klarifiká di responsabilidat
A inkluí kiko tur e responsabilidatnan ta, pa por duna un kuido adekuá pa hóben. Por ehèmpel e empeño di siñalamentu trempan di problema, enbolbí i fortifiká su medioambiente i e famia, i duna kuido ku ta tuma lugá “mas na kas posibel”. Tambe a klarifiká e repartishon di responsabilidat entre Entidat Públiko di Boneiru, Saba i Sint Eustatius i Kuido i Hubentut Hulanda Karibense (ZJCN).
Kolaborashon fluido
Ademas a yega na palabrashon tokante kolaborashon entre dunadó di kuido pa hóben i e forma kon nan por sinkronisá ku otro. Na momentu ku mester amplia òf redusí kuido pa hóben mester pèrkurá pa esaki tuma lugá di forma mas fásil posibel. Esaki ta enserá tambe un interkambio seif i efisiente di informashon.
Kompromiso pa kalidat
Finalmente, ku e palabrashonnan aki, e Entidatnan públiko ta komprometé nan mes ku sierto normanan pa kalidat di kuido. Un di e palabrashonnan ta ku dentro di algun siman despues di e promé kombersashon ta elaborá un plan di asistensia pa e hóben i su mayornan i ku esaki mester ta di akuerdo ku e hóben i su mayornan. Tambe e intenshon ta pa e oferta di kuido pa hóben sigui siña di e nesesidatnan di e grupo di enfoke i sigui adaptá i mehorá riba esaki.
Sistema di kuido Karibense na midí
E ambishon ta pa brinda Hulanda Karibense un servisio di kuido (pa hóben) ekivalente ku Hulanda Europeo i pa ankra e kalidat i aksesibilidat di esaki di forma duradero den lei. Pa logra esaki lo traha e añanan benidero riba un sistema di kuido, hubentut i sosten sosial Karibense na midí.
Sinembargo, sierto asuntu ta pidi atenshon di inmediato, manera klarifikashon di e repartishon di responsabilidat di kuido pa hóben i mehorashon di ehekushon di e responsabilidatnan. Pa e motibu aki a skohe pa di awó tuma un paso intermedio ku e palabrashonnan atministrativo aki. E eksperensianan ku e palabrashonnan atministrativo aki tambe lo forma parti den e elaborashon final di e sistema.