Inisio konsulta riba internèt tokante reglanan finansiero i di kalidat pa akohida di mucha
Den e ‘Dekreto Akohida di Mucha BES’ segun e ‘Wet Kinderopvang BES’ (Lei di Akohida di Mucha BES) a spesifiká e reglanan ku ta bai apliká riba kalidat, interkambio di dato i finansiamentu di akohida di mucha na Hulanda Karibense. Tur hende por duna ‘feedback’ awor riba e reglanan aki via un konsulta riba internèt. E meta ta pa brinda tur mucha na Hulanda Karibense un akohida di mucha ku ta bon, seif i pagabel, di manera ku kada mucha tin oportunidat pa desaroyá su mes optimalmente.
![B4K](/binaries/medium/content/gallery/rijksdienstcn-nederlands/content-afbeeldingen/b4k/logo_best4kids-website.jpg)
Resientemente a aprobá e proposishon di lei Akohida di Mucha BES (Kinderopvang BES). E ekspektativa ta ku entrante promé di yüli 2025 e lei aki ta drenta na vigor. Awor a elaborá riba e reglanan mas spesífiko tambe. Hopi di e eksigensianan di kalidat ta koinsidí ku e eksigensianan ku ya ta na vigor via di e Ordenansa(nan) Insular Akohida pa mucha. Durante e seshonnan di konsulta a papia diferente biaha kaba tokante e reglanan aki ku organisashonnan di akohida di mucha, mayor- i otronan ku ta involukrá. A base di esaki a adaptá e reglanan na e konteksto karibense. Por ehèmpel, na momentu di determiná e kantidat di mucha ku por akomodá, ta konsiderá e pòrch di un akohida di mucha parsialmente komo espasio interior.
Ademas a hasi e eksigensianan di kalidat mas severo pa evitá retrasonan den desaroyo i siñamentu. Pa esaki un akohida di mucha mester sigui e desaroyo di e muchanan i den e akohida di mucha mester traha ku un programa di edukashon preeskolar. Pa e akohida despues di skol ta rekerí un programa di aktividat variá ku ta mas ku djis traha hùiswèrk. A elaborá e rekisitonan na kual e programanan aki mester kumpli kuné.
Finansiamentu
Ta e intenshon ku e unidat SZW di RCN ta bai implementá e areglo finansiero i tambe finansiá akohida di mucha por gran parti. Den e Dekreto Akohida di Mucha BES a elaborá riba tur e regla- i kondishonnan pa finansiamentu. Asina ta ku por ehèmpel finansiamentu únikamente por tuma lugá den kaso ku ta trata di un akohida struktural i pues ku presensia di e mucha.
Pa e próksimo dos aña mayornan ta sigui paga e mesun suma ku awor. Pa mayornan ku no por paga, e Entidat Públiko ta brinda e posibilidat pa paga e kontribushon di mayor (parsialmente).
Último oportunidat pa reakshoná
Promé ku tur regla bira definitivo, Gobièrnu Sentral ta organisá un último konsulta (ònlain). Te ku 15 di sèptèmber 2024 bo por reakshoná via di e wèpsait di konsulta: https://www.internetconsultatie.nl/nadereregelsomtrentdekwaliteitfinancieringengegevensverwerkingtenbehoevevankinderopvang.