E Intervenshon di estilo di bida Kombiná, kolaborashon pa un estilo di bida salú na Boneiru
Primary Care Caribbean, Kuido i Hubentut Hulanda Karibense (ZJCN), Fysio di Bario, Gezondheidscentrum Bon Bida Bonaire i JOGG (Gezonde Jeugd, Gezonde Toekomst) ta traha huntu pa pone e intervenshon di estilo di bida kombiná (Gecombineerde Leefstijlinterventie, GLI) disponibel pa abitante ku tin sobrepeso òf obesidat na Boneiru. GLI ta un programa di dos aña ku guia di un ‘coach’ di estilo di bida.
![Gezonde leefstijl](/binaries/medium/content/gallery/rijksdienstcn-nederlands/content-afbeeldingen/nieuws-afbeeldingen/2024/algemeen/gezonde_leefstijl.jpg)
Intervenshon di estilo di bida Kombiná
Coachnan di estilo di bida di e práktika di fisioterapia di Gezondheidscentrum Bon Bida Bonaire i Fysio di Bario ta implementá e GLI. E enfoke di GLI no ta solamente pa pèrdè peso, pero tambe pa yuda hende pa biba salú i sinti bo mes fet. Un peso salú i moveshon regular ta yuda pa prevení diferente problema di salú. Den e GLI, coachnan di estilo di bida ta buska huntu ku e partisipante manera kon un hende por siña un estilo di bida mas salú i kon pa mantené esaki. Esaki ta varia pa kada persona i ta un programa úniko.
Treinen
E asistentenan di práktika di e dòkternan di kas na Boneiru lo tin un ròl den referensia pa GLI. Nan por referí adulto ku ta sobrepeso òf obesidat na un GLI si esaki ta pas pa e situashon di e persona. Dia 5, 6, i 10 di yüni asistentenan di práktika na Boneiru a haña un treinen. Den e treinen, asistentenan di práktika a siña entre otro kon nan por tene diálogo motivante ku hende ku tin sobrepeso òf obesidat tokante nan estilo di bida i kon nan por yuda pa haña e apoyo i kuido korekto. JOGG a duna e treinen aki na Boneiru, huntu ku e implementadónan di GLI. E partisipantenan lo risibí un sertifikado.
Añanan ku a pasa partidonan na Boneiru a praktiká ku GLI den forma di un ‘pilot’. A base di e eksperensia aki, a hasi vários adaptashon pa hasi GLI mas adekuá pa Boneiru.
Notisia na nòmber di ZJCN, PCC, Fysio di Bario, Gezondheidscentrum Bon Bida Bonaire i JOGG.