Huntu kontra violensia doméstiko i maltrato di mucha: e ròl krusial di siudadanonan
Entrante promé di yanüari, a introdusí Kódigo di Protekshon kontra Violensia Doméstiko i Maltrato di Mucha a ofisialmente na Boneiru, Sint Eustatius i Saba. E regulashon nobo aki no ta duna solamente profeshonalnan guia pa por identifiká i tuma akshon kontra violensia, pero tambe ta pone énfasis riba e ròl importante di siudadanonan pa krea un komunidat seif i atento.
E ròl di siudadano den señalamentu di situashonnan ku no ta seif
Tur hende por kontribuí na prevení i tuma akshon kontra violensia doméstiko i maltrato di mucha. Siudadanonan tin un ròl krusial den rekonosé i kombersá tokante señalnan. Den komunidatnan chikí manera esnan di Boneiru, Sint Eustatius i Saba, hende konosé otro i ta mira otro. Esaki ta fasilitá pa señalá ora un hende no ta sinti su mes bon òf ora ta trata di un situashon den kas ku no ta seif. Pa motibu ku e por ta difísil pa tuma akshon, mas tantu ainda den un komunidat chikí, Sentro pa Mèldu i tuma Konseho tokante Violensia Doméstiko i Maltrato di Mucha (Advies- en Meldpunt Huiselijk Geweld en Kindermishandeling AMHK) ta konsentrá riba konseho i sosten. Siudadanonan por tuma kontakto pa hasi pregunta tokante señalnan di violensia òf maltrato i haña konseho tokante e mihó manera pa yuda.
Den kua situashon konseho por yuda?
E Sentro pa Mèldu i Tuma Konseho ta pará kla pa tur persona ku tin duda òf preokupashon tokante seguridat di un otro. Por ehèmpel, ora bo señalá ku un hende grandi den famia ta dependé di kuido di un otro persona, pero ta mustra síntoma di angustia regularmente. Ta posibel tambe ku un bisiña ta konta bo ku su pareha ta kontrol'é konstantemente i e no tin akseso na su mes sèn mas. Kisas un amigu ku un limitashon ta konfia bo ku esun ku ta kuid’é ta zundr'é i menas'é.
Otro situashonnan por ta ku bo ta tende hopi gritamentu na un kas den bisindario i bo ta preokupá pa e muchanan i pareha ku ta biba den e kas, òf ora un kolega ta bisa bo ku su pareha ta maltrat'é físikamente, pero e tin miedu pa buska yudansa. Den tur e situashonnan aki, e Sentro pa Mèldu i Tuma Konseho por yuda ku konseho práktiko i pasonan pa sigui, pa duna sosten na un persona òf inisiá e kòmbersashon tokante e situashon.
Tuma kontakto ku e Sentro pa Mèldu i Tuma Konseho
Riba kada isla tin un Sentro pa Mèldu i Tuma Konseho kaminda siudadanonan i profeshonalnan por tuma kontakto. Na Boneiru, e Sentro pa Mèldu i Tuma Konseho ta Guiami, situá na Sentro Akseso, i por yama nan na 0802 0802. Na Sint Eustatius por tuma kontakto ku Social Support Units di Openbaar Lichaam Sint Eustatius (OLE) na +599 318 4837. Pa residente di Saba, Department of Community Development & Culture di Openbaar Lichaam Saba (OLS) ta disponibel na +599 416 6936 òf +599 416 3053. Den kaso di situashonnan ekstremo òf peligroso, semper mester yama polis.
E Sentro pa Mèldu i Tuma Konseho ta pará kla na kada isla pa kontestá pregunta i duna sosten. Dor di rekonosé señalnan i tuma akshon, nos ta kontribuí huntu na un komunidat seif i atento na Hulanda Karibense.