Mas ku 140 bishitante pa e funshon di teatro ‘Stimá i Protehá’
Di 12 pa 15 di mei un funshon di teatro interaktivo a tuma lugá bou di e nòmber Stimá i Protehá. Tei p’abo den kolaborashon ku ‘storyteller’ Archell Thompson i dos aktor lokal talentoso a organisá e seri. E promé seshon a tuma lugá na Jong Bonaire i tabata dediká spesial na hubentut. A tene e siguiente funshonnan na bario di Tera Kòrá, Amboina, Nikiboko i Rincon, pa hasi esaki mas aksesibel posibel pa habitantenan di bario.
Na total mas ku 140 persona a partisipá. Ku ayudo di aktornan a simulá un situashon fiktivo pero rekonosibel, basá riba situashonnan real ku ta pasa na Boneiru. E públiko presente a haña e ròl di investigadó. Pa pone nan den nan ròl di investigadó, nan a haña un asina yamá “Casuslabjas”. (Casuslabjas: ta e paña blanku ku ta usa den por ehèmpel laboratorio).
Temanan manera seksualidat seif, protekshon i límite tabata pará sentral. E funshonnan a ofresé un ambiente seif i interaktivo pa deliberá huntu tokante tópikonan difísil ku normalmente ta keda sin trata.
E meta di Stimá i Protehá ta pa krea konsientisashon i posibilidat pa deliberá. E embolbimentu di e públiko tabata grandi. Hopi bishitante a pensa ku tabata un situashon real, ku ta mustra kuantu e storia a toka nan. Na final di kada funshon a saka e aktornan for di nan ròl i a enfatisá ku tabata trata di un situashon simulá.
Tei p’abo
Tei p’abo den kolaborashon ku instansianan di yudansa na Boneiru ta enfoká riba amplia konsientisashon i posibilidat pa deliberá tokante violensia doméstiko i maltrato di mucha. E inisiativa ta parti di e akuerdo di gobernashon enfoke violensia doméstiko i maltrato di mucha Hulanda Karibense. Kuido i Hubentut Hulanda Karibense, Mental Health Caribbean, Stichting Reclassering CN, Voogdijraad i Entidat Públiko Boneiru.