De Nederlandsche Bank

De Nederlandsche Bank (DNB) ta komprometí ku stabilidat finansiero i ta aportá asina na prosperidat duradero den Hulanda.

Pa esei DNB komo banko sentral independiente, supervisor i outoridat di resolushon, ta traha huntu ku partnernan oropeo riba:

  • Stabilidat di preis i un desaroyo makroekonómiko balansá den Oropa
  • Un sistema finansiero ku ta resistente kontra gòlpi i un tráfiko di pago seif, konfiabel i efisiente
  • Institutonan finansiero sólido i íntegro ku por kumpli ku nan obligashonnan i kompromisonan

Dor di duna konsehonan ekonómiko independiente, DNB ta fortifiká e maneho dirigí riba su metanan primario.

Pa Hulanda Karibense DNB ta responsabel pa e tráfiko di pago i supervishon riba institutonan finansiero.

Pa e tráfiko di pago funshoná korekto DNB ta pone papel- i monedanan di dòler merikano den sirkulashon i ta vigilá nan kalidat. Mas aleu DNB ta hasi esfuerso pa e tráfiko di pago ta efisiente dor di promové pagonan elektróniko i deskurashá uso di chèk.

DNB ta supervisá empresanan finansiero den Hulanda Karibense. DNB ta hasi esei huntu ku Autoriteit Financiële Markten i Banko Sentral di Kòrsou i Sint Maarten. E supervishon akí ta konsistí di dos pilar: supervishon prudensial i supervishon di integridat. Supervishon prudensial ta dirigí riba empresanan finansiero sólido i un sistema finansiero stabil. Supervishon di integridat ta dirigí riba un sektor finansiero limpi i íntegro. Bou di supervishon di integridat ta kai e aserkamentu di kriminalidat finansiero ekonómiko, manera prevenshon di labamentu di plaka, malversashon, korupshon i violashon di e lei di sanshon. Bou di supervishon di integridat ta kai tambe supervishon pa tin un kultura di empresa íntegro, dunamentu di pèrmit i evaluá dirigentenan riba kapasidat i konfiabilidat.