Diskurso di Minister Presidente Mark Rutte (Papiamentu)

Discurso | 19-12-2022

Dama- i kabayeronan, bon tardi.
I pa tur ku ta wak i skucha den un otro zona orario:
Bun morgu,
Bon dia,
Good morning,

Aki den Archivo Nashonal historia ta papia ku nos den miónes di dokumento. I ounke ku nos no ta tende e bosnan no skirbi di den pasado, e storia ku ta resaltá for di tur e dokumentonan di archivo ei, no ta solamente bunita. Hopi bia e ta tambe mahos, doloroso i bergonsoso frankamente. Esei ta konta sigur pa e papel di Hulanda den pasado di sklabitut.

Nos, ku ta bibando den presente, solamente por rekonosé i kondená sklabitut den término ku no ta laga duda, komo krímen kontra humanidat. Komo un sistema kriminal, ku rònt mundu a kousa sufrimentu inkalkulabel i grandi na un kantidat inkalkulabel di persona, i ku ta sigui afektá bida di hende den presente.

I nos na Hulanda mester enfrentá nos parti den e pasado ei. P’esei ta bon pa nos topa otro awe den Archivo Nashonal. Aki nos memoria nashonal ta wardá. Esaki pues ta e lugá pa investigashon di e konsenshi nashonal.

Aki bo no por ignorá e echonan históriko. Te 1814 negoshantenan di katibu hulandes a barka mas di 600.000 hende muhé, hòmber i mucha afrikano sklabisá bou di sirkunstansianan deplorabel, pa e kontinente merikano.

Mayoria di nan pa Sürnam, pero tambe pa Kòrsou, Sint Eustatius i otro sitionan. A ranka nan for di nan famia, a deshumanisá nan, a transportá i trata nan manera animal. Hopi bia bou di mando gubernamental di ‘West-Indische Compagnie’. Na Asia a trafiká entre 660.000 i mas di 1 mion persona – nos no sa mes kuantu eksaktamente – denter di e áreanan ku tabata bou di mando di ‘Verenigde Oost-Indische Compagnie’.

E sifranan ta inkreibel. E sufrimentu humano skondi nan tras, ta aun muchu mas inimaginabel.

Innumerabel ta e kantidat di storia- i testimonionan traspasá ku ta proba kon den e sistema di sklabitut no tabatin límite pa krueldat i arbitrariedat. I por lo tantu ningun límite pa inhustisia i puru miedu. Nos mester djis habri 'Wij slaven van Suriname' di Anton di Kom pa lesa tokante e trato- i kastigunan di mas kruel.

Nos ta lesa tokante sota ku suip i tortura te na morto, tokante personanan ku nan tabata korta nan miembronan kita afó, tokante markamentu ku heru kayente den kara. E destino di esun persona tabata mas teribel ainda ku di e otro, riba kada página inhustisia i mas inhustisia.

I manera Anton de Kom a deskribié pa Sürnam, asina el a sosodé tambe na otro lugánan, bou di e mes mando gubernamental hulandes. Nos ta lesa esei, nos sa esei, i tòg ta difísil pa komprondé e destino horibel di personanan sklabisá.

Of tuma, enbèrdat, e echonan manera nan ta papia for di den e archivonan. Por ehèmpel for di den e enorme atministrashon ku a forma rònt di abolishon di sklabitut na 1863 i ku por tira un bista aden aki.

Página tras di página tin ei den menshoná, pa kada plantashi i pa kada doño di katibu, nòmbernan di esnan sklabisá plùs algun otro dato personal mas. Funshonal, sistemátiko, den un enumerashon seku, ku hustamente pa e motibu ei ta asina polémiko, komo ku e ta suprayá apsurdes di e sistema den kua esun persona tabata kombertí e otro persona den un merkansia.

Un sistema asina inhumano i inhustu, ku na 1863 estado no a kompensá finansieramente esnan sklabisá, sino e doñonan di katibu. I e tabata por mas kruel ainda, mas inhustu, komo ku tur hende na Sürnam ku na 1863 pa nòmber a bira liber, obligatoriamente mester a keda traha ainda 10 aña mas bou di supervishon di estado.

Básikamente esei tabata nifiká pa hopi hende otro 10 aña mas un bida sin libertat, un bida bou di sumishon. Te 1873. E aña ku ta bin ta 150 aña pasá.

E historia ei ta tene nos okupá. Un historia kompleho, den kua na diferente lugá diferente fecha i akontesimentu tin nifikashon.

No solamente 1863 i 1873. Pero por ehèmpel 1860 tambe, e abolishon legal di sklabitut na eks India Oriental Hulandes. 1814, e aña ku Hulanda tambe a abolí komersio di katibu transatlántiko. 1848, tempu ku na Sint Maarten sklabitut bon mirá a terminá. Of por ehèmpel 1795, tempu ku bou di guia di Tula un rebelion a tuma lugá na Kòrsou ku te ainda ta ser konmemorá anualmente. Kantidat infinito di momento, kantidat infinito di kuenta, kantidat infinito di historia.

E historia ei e último añanan ta hañando mas atenshon – den eksposishon-, publikashonnan i den debate sosial. Tin konsientisashon sosial tumando lugá. I pa e motibu ei tambe un kambio den pensamentu. Esei ta bon i na su lugá i nesesario, pasobra a keda ketu muchu largu.

Ami tambe a pasa den e kambio di pensamentu ei personalmente – mi kier ta habrí tokante esei. Hopi tempu mi a pensa ku no tabata posibel asumí responsabilidat di forma signifikativo pa algu ku a sosodé asina hopi tempu pasá, i ku ningun di nos no a presensia personalmente. Hopi tempu pues mi a pensa eigenlijk: e pasado di sklabitut ta historia ku ta tras di nos.

Pero mi tabata ekiboká. Pasobra siglonan di opreshon i eksplotashon tin efekto den presente. Den stereotiponan rasista. Den patronchinan diskriminatorio di eksklushon. Den desigualdat sosial.

I pa kibra ku esei, nos mester enfrentá e pasado di forma abierto i honesto. Un pasado ku nos ta kompartí ku otro paisnan, ku ta pone ku pa semper nos sosiedatnan ta uní ku otro na un manera spesial.

Ta bèrdat ku niun hende ku ta biba na e momentunan akí no ta karga kulpa personalmente pa sklabitut. Pero ta bèrdat tambe ku Estado Hulandes den tur su manifestashonnan históriko ta karga responsabilidat pa e sufrimentu grandi ku a kousa na esnan sklabisá i nan desendientenan. I pues nos no por ignorá e impakto di e pasado den nos tempu.

E rapòrt ‘Ketenen van het verleden’ di e Grupo di Diálogo Pasado di Sklabitut ta hunga un papel importante den e proseso di konsientisashon ku hopi di nos ta pasando aden. A publiká e rapòrt ei riba 1 di yüli aña pasá i e tabata kontené un kantidat di konklushon i rekomendashon stret. E tres palabranan klave ta: rekonosementu, diskulpa, rekuperashon.

Awe nos ta manda e reakshon ofishal di gabinete pa Tweede Kamer. Ei den nos ta brasa e análisis i konklushonnan di e Grupo di Diálogo.

Den e aña i mei ku a transkurí gabinete a papia na diferente manera, na diferente lugá i ku diferente persona i grupo riba pasado di sklabitut. Ami mes tabata na Sürnam na sèptèmber último, unda mi a siña kon profundo e historia te ainda ta intervení den bida diario di e hendenan, spiritualmente tambe.

Mi a siña tambe kon eksperensia, rekuerdo i sentimentu por diferensia pa kada grupo i pa kada persona. Ta importá si a hòrta bo antesedentenan for di Afrika òf si nan tabata pertenesé na e habitantenan original. Ta importá den kua pais òf region nan bida a desaroyá. I ta importá tambe den kua periodo nan a biba.

E diferensianan históriko, geográfiko i kultural ei entre gruponan di poblashon i personanan ta importá, den presente tambe. I esei ta pone ku ta asina vulnerabel tambe pa hasi ekspreshonnan general riba e pasado di sklabitut.

Pasobra ta duna tur e diferensianan ei loke nan meresé? Ki ta e mihó momentu pa esei?

Kon ta duna tur e símbolo- i ritualnan spiritual, ku den sierto kultura ta asina enormemente importante, loke nan meresé? I kon bo ta inkluí ku palabra asina tantu inhustisia, asina tantu doló, asina tantu atrosidat?

Kualké intento pa hasi esei lo ta semper imperfekto i lo lanta pregunta i diskushon nobo. Ku tur emoshon korespondiente. Ku tur peso.

Nos sa ku no ta eksistí un bon momentu pa tur hende, no tin e palabranan korekto pa tur hende, no tin un lugá adekuado pa tur hende. I mi ta rekonosé ku e preparashon pa e dia akí por a bai mihó.

Pero no laga esei ta un motibu pa no keda sin hasi nada numa. Huntu nos mester dal stapnan padilanti. Huntu nos mester sigui avansá. Pues por fabor laga nos hiba e kombersashon ei riba pasado di sklabitut, te asta si e ta un kombersashon difísil.

I e kombersashon ei ta kuminsá ku rekonosimentu. Rekonosimentu di e teribel sufrimentu ku a kousa na generashonnan di personanan sklabisá. Rekonosimentu di e rehabilitashon pa tur e personanan ku a rebeldiá, manera e ‘Marronnan’ balente di Sürnam.

Ku rèspèt mi ta menshoná awe nòmbernan di Tula na Kòrsou, Jolicoeur, Boni i Baron na Sürinam, One-Tété-Lohkay na Sint Maarten, i nos ta konmemorá tur hende muhé i hende hòmber anónimo, ku heroikamente a buska libertat a traves di siglonan i hopi bia a keda kastigá di e forma di mas hororoso pa esei.
I naturalmente rekonosementu di responsabilidat históriko, ku e palabranan korespondiente. E palabranan akí.

Durante siglonan estado hulandes i su representantenan a permití, stimulá, mantené sklabitut i saka probecho di dje. Durante siglonan a kombertí personanan den merkansia, eksplotá i maltratá nan den nòmber di estado hulandes. Durante siglonan a trapa dignidat humano di e forma mas hororoso bou di mando hulandes. I muchu poko e susesivo gobièrnunan hulandes despues di 1863 a mira i rekonosé ku e pasado di sklabitut tabatin i tin un impakto negativo.

Pa esei, na nòmber di gobièrnu hulandes, mi ta pidi diskulpa.
 

Today I apologize.
 

Awe mi ta pidi diskulpa.
Tide mi wani taki pardon.

Awe mi ta pidi na nòmber di gobièrnu hulandes diskulpa pa e aktitut di estado hulandes den pasado: póstumo na tur esnan sklabisá ku rònt mundu a sufri bou di e aktitut ei, na nan yunan, i na tur nan desendientenan te ku awe den presente. Nos no ta hasi esaki  pa lubidá e pasado. No pa sera e pasado i lag’é nos tras.

Nos ta hasi esaki na e momentunan akí, pa na bispu di un aña di konmemorashon importante, konhuntamente haña e kaminda pa sigui padilanti. Nos no ta kompartí solamente pasado, pero tambe futuro. Pues awe nos ta pone un kòma, no un punto.

E kombersashon tokante pasado di sklabitut mester tuma lugá mas amplio posibel, no solamente na Hulanda, pero al kontrario na e lugánan unda el a tuma lugá, ku tur hende ku ta embolbí òf ku ta sinti nan mes embolbí.
Pa e motibu ei e diskulpa ku mi a kaba di ekspresá awe, ta resoná na shete otro parti di mundu, kaminda mas ta sinti e doló i e konsekuensianan di e pasado di sklabitut te ku dia di awe i nan ta mas visibel.

Nan ta resoná den e palabranan ku shete representante di gobièrnu hulandes ta pronunsiá awe. Na Sürnam. Na Kòrsou. Na Sint Maarten. Na Aruba. Na Boneiru. Na Saba. I na Sint Eustatius.

“Nos ta hasi esaki, i nos ta hasi esaki na e momentunan akí, pa pará na bispu di un aña di konmemorashon importante, konhuntamente haña e kaminda pa bai padilanti. Nos no ta kompartí solamente pasado, pero tambe futuro. Pues awe nos ta pone un kòma, no un punto.”

Gobièrnu, den konsulta ku tur grupo i persona di tur pais ku kende nos ta kompartí e pasado akí, kier traha mas intensivo riba mas konosementu tokante di e pasado di sklabitut i pues riba mas konsientisashon, rekonosementu i komprenshon. E proseso ei ta tuma tempu i ta solamente konhuntamente nos por hasi e trabou. Na kaminda pa e fecha simbóliko i importante ei di 1 di yüli 2023.

Despues, den henter e aña di konmemorashon. I den e añanan ku ta sigui despues.

E reakshon di gabinete riba e rapòrt di e Grupo di Diálogo Pasado di Sklabitut  ta bai profundo den esaki. Mas importante ta na e momentunan akí pa realmente nos dal e stapnan konhuntamente. Den konsulta, skuchando i ku e úniko intenshon: hasi hustisia na e pasado, sanashon den presente.
Un kòma, no un punto.

Ku Sürnam, ku e partinan karibense di Reino i ku tur desendiente na Hulanda, nos ta trahando riba visibilidat di patrimonio, riba konsientisashon pa medio di enseñansa i riba investigashon históriko sientífiko. Durante e aña di konmemorashon tur faseta di e pasado di sklabitut i su efekto den nos tempu lo ta den sentro di atenshon. Rei ta sinti su mes personalmente hopi embolbí ku e tópiko i lo ta presente riba 1 di yüli durante e konmemorashon i selebrashon na Amsterdam.

I nos ta wak mas leu, despues di 2023. Un Komité di Konmemorashon independiente i amplio formá ta bai studia e mihó manera pa den futuro tambe konmemorá huntu di forma digno i  mas tantu posibel konhuntamente.

Ta bin un fondo pa inisiativanan sosial den henter Reino i Sürnam, ku kua ta bai duna visibilidat, atenshon i aserkamentu nesesario na e efekto di e pasado di sklabitut.
E proseso di sanashon mester kuminsá awor i e programa pa esei, nos ta skirbi huntu.

Dama- i kabayeronan,

E buki di nos historia kompartí konosé hopi página ku ta yena nos – ku ta biba den siglo 21 – ku asombro i repudio. I ku bèrgwensa profundo.

E páginanan ei nos no ta eliminá ku diskulpa i esei  no ta e intenshon  tampoko. Nos no por kambia pasado, solamente enfrent’é.

Loke gobièrnu ta deseá ferviente, loke ami personalmente ta deseá ferviente tambe, ta ku e momentu akí, ku e dia akí lo yuda nos den henter Reino i huntu ku Sürnam i otro paisnan, pa yena e páginanan  habrí nos dilanti ku diálogo, rekonosimentu i sanashon.

Masha danki.