Prólogo sekretario di estado Alexandra van Huffelen (Papiamentu)
No tin nada ku tabatin un influensia mas fuerte riba mi vishon riba e pasado di sklabitut hulandes, ku e kòmbersashonnan ku mi a hiba ku mucha di skol na Hulanda Karibense. Hóbennan ku ta bisa abiertamente ku nan ta sinti nan mes siudadano di segundo kategoria; ku na Hulanda Oropeo nan ta mirá komo ‘inferior’ na otronan di nan edat na Hulanda Oropeo. Durante e kòmbersashonnan ei mi tabata kara kara ku e kaminda ku nos tin di kana ainda.
Meskos ku ta imposibel pa den un spich realmente duna e importansia meresí na un historia di sentenáres di aña di eksplotashon, tortura i deshumanisashon, asina ta mes imposibel pa den un página indiká e balor di e spichnan kolekshoná den e buki aki. Tòg mi ke hasi un intento.
E título di e kolekshon aki no por tabata otro ku Een komma, geen punt (Un kòma, no un punto). E frase di mas remarkabel den e spich di Promé Minister Rutte tambe ta reflehá e 13 spichnan aki. Pero tambe, e ta na sentro di un debate ekstenso den Reino, i di e maneho ku ta duna kontenido na trato di e historia aki i na e relashon entre Hulanda i Aruba, Kòrsou, Boneiru, Sint Maarten, Sint Eustatius, i Saba. Aki no ta hala un liña bou di pasado, sino un kòma históriko. Bòltu un blachi den un buki di siglonan bieu, ku ta yen di sufrimentu i inhustisia, pero di kua nos ta bai skibi e siguiente kapítulo huntu.
Dia 19 di desèmber, Promé Minister Mark Rutte, na nòmber di gobièrnu, a pidi despensa pa e pasado di sklabitut. Un sistema di 400 aña di kolonialismo, eksplotashon i deshumanisashon establesí pa estado, ku durante siglonan tabata forma e fundeshi sosial, ekonómiko, i polítiko di e sosiedat hulandes. Mas ku 150 aña despues di abolishon di sklabitut, nos por bisa ku e di 19 di desèmber aki tabata e dia riba kua realmente nos a enfrentá e historia aki. I ku esaki, di un banda e realisashon ku komo sosiedat, nos tin muchu tiki konosementu di e historia aki; i di otro banda, ku hopi bia no a dokumentá bida di esnan sklabisá. Asina, minister Van Gennip na Boneiru ta puntra su mes: ‘Si nos por a kana huntu ku esnan sklabisá, seis ora largu, di Mangazina di Rei pa e saliñanan, kua storianan nos lo a tende e ora ei?’
Na kaminda pa e fecha aki, atrobe a bin dilanti kon kouteloso e trato di e historia aki mester ta i kon diverso e perspektivanan ta. Diskushonnan tokante ken eksaktamente ta pidi despensa di ken, pakiko esei ta sosodé i si esei realmente ta nesesario. Diskushonnan tokante e forma, e fecha i e proseso, tambe. Pa hopi tempu nan tabata dominá notisia, i ta parse ku nan tabatin nan reperkushon den e tekstonan papiá, tambe. Ta doloroso ku aki aya asta a yama e proseso ‘kolonial’, pero alabes un lès importante. E ta rekordá nos di e importansia di diálogo kontinuo, por ehèmpel ora di huntu formulá e aña di konmemorashon.
Skucha, haña skremènt di algu, i kambia komprenshon progresá den echo tambe ta forma un tema ku ta sigui bin dilanti den e spichnan aki. P’esei mes, e despensa aki no ta solamente konserní e desendientenan di esnan sklabisá, sino tambe sobrá di e poblashon hulandes. Asina, Promé Minister Rutte ta para ketu ekstensivamente na e proseso di konsientisashon personal ku el a pasa aden. E skuchamentu ei, skucha e hendenan konserní, ku literalmente ta karga e historia aki den nan sanger, ta e kaminda pa un kambio di konsenshi kolektivo. Esei ta nesesario, pa huntu buska kontesta riba preguntanan diverso. Tokante loke ta nesesario pa por partisipá di forma ekivalente na Hulanda, tokante futuro di relashonnan den Reino, tokante kon nos por oumentá konsientisashon, i huntu forma un sosiedat balansá. Pasobra, manera Promé Minister Rutte a bisa: ‘Siglonan di abuzu i eksplotashon ta sigui hasi nan trabou den e mundu di awor. Den patronchinan diskriminatorio di eksklushon. Den desigualdat sosial.’
Den bista di esei, ta remarkabel pa mira kon konkretamente aki ta papia di e sufrimentu di e pasado di sklabitut. Tin bia ku palabra direkto, ku término ku no por komprondé robes – Promé Minister Rutte ta usa kualifikashonnan manera ‘sistema inhumano’ i ‘krímen kontra humanidat’, miéntras ku Promé Minister Wever-Croes di Aruba ta papia tokante ‘e identidat di esnan kadená, ku kolonisashon a plèchè i desfigurá.’ Tin papiamentu tokante e krueldatnan teribel: tokante dalmentu ku zjuip i tortura, tokante amputashon i markamentu ku heru kayente. Pa muchu tempu Hulanda a kita su bista for di e bandanan skur di e historia aki. Un trato signifikativo di inhustisia históriko na promé lugá ta pidi pa nos tribi enfrentá e detayenan horibel di esaki.
Inkonfundibel tambe ta e yamada pa rehabilitashon pa diferente héroe di resistensia. Asina, vários orador ta papia di rehabilitashon di Tula. Promé Minister Rutte ta menshoná nòmber di One-Tété-Lohkay, miéntras ku sekretario di estado Van der Burg na Aruba ta defendé Virginia Dementricia. Nan i hopi otro mester a paga nan lucha heroiko te den morto pa un eksistensia digno di ser humano pa despues sigui karga nòmber di terorista. Semper lo mi sigui kòrda e eksploshon di emoshon ku mi a mira ora riba e 19 di desèmber ei, na e monumento di konmemorashon di e luchadónan di resistensia na Willemstad, mi tabatin e honor di anunsiá rehabilitashon di Tula, komo un di e momentunan di mas kargá i di mas spesial den mi karera.
E storianan di Tula, Gaai, i otronan sigur lo tin nan propio lugá den e futuro museo di Sklabitut. Ademas, e gabinete lo invertí den konsientisashon i enseñansa tokante e pasado kolonial i di sklabitut– na e islanan, tambe. Asina e gabinete ke logra ku nos, komo komunidat, ta bira konsiente di pasado i e influensia di esei den presente - ‘visibel, invisibel i ketu bai notabel kada dia’, manera gezaghèber di Boneiru Edison Rijna, ta ekspres’é. Den desigualdat entre Hulanda Oropeo i e parti Karibense di Reino, den efektonan riba e salú físiko òf mental. Na Hulanda Oropeo, tambe den skandiamentu di lema rasista riba tribuna di futbòl, òf den estadístikanan tokante diskriminashon riba merkado laboral. E konsekuensianan ta tantu konkreto i direkto komo kompliká i sin base.
E ta suprayá ku pidi despensa no ta hala un strepi bou di e historia aki. En bes di esei, e ta un punto di salida pa, ku e perspektiva di e aña rekordatorio, huntu traha riba kurashon, rekonosementu, i rekonsiliashon.