CN-Express ta konektá Islariba ku Boneiru
E ministerionan di Asuntunan Interno i Relashonnan di Reino (BZK) i Infrastruktura i Waterstaat Maneho di awa (IenW) ta uni forsa bin ku un konekshon aéreo entre Boneiru i Islariba.
E siman aki Ruud Peters (hefe di servisio di ‘Shared Service Organisatie’ di RCN) riba enkargo di BZK a firma un kombenio ku Winair.
Despues di e orkannan Irma i Maria e ‘hub’ internashonal importante di Sint Maarten a kai afó. Saba i Sint Eustatius tin mester di aksesibilidat èkstra pa nan desaroyo ekonómiko, trasladonan médiko i tráfiko pa trabou pa habitantenan di e isla.
Bou di e nòmber CN-Express, durante un periodo di tres luna, lo bai realisá buelonan riba tur djaluna i djabièrnè. Despues di seis siman lo evaluá si e ta kumpli ku e nesesidat. E promé buelo ta planiá pa 26 di febrüari. Riba e ruta nobo ta bai hasi uso di un avion ATR42 di Air Antilles. E avion akí ku tin 48 stul ta bula entre Sint Maarten, Sint Eustatius i Boneiru. Pa e konekshon ku Saba ta hasi uso di un di Twin-otter feeder di Winair. E buelo direkto entre Boneiru i Statia ta dura mas òf ménos 2 ora.
RCN lo okupá un kantidat di kupo riba kada buelo pa trasladonan médiko i empleadonan. Ademas, un kantidat di kupo figo ta pa benta liber. E pasashinan tin un preis di $300 pa bai so. E preis akí ta konta pa e vuelonan BON-EUX, BON-SAB i BON-SXM (òf visevèrsa). E tarifa no ta inkluí impuesto di aeropuerto ni gastunan di reservashon.
CN-Express ta kuminsá dos luna despues ku a spera. Den e simannan tras di lomba a traha duru riba seramentu di un kombenio ku WinAir, ku den e lunanan despues di e dos orkannan tabata enfoká riba restablesé nan rutanan eksistente.
Pa mas informashon tokante pasashi por tuma kontakto ku BON Travel (info@bontravel.com) òf wak riba den e dianan binidero riba www.fly-winair.sx