Areglo di Supsidio Atrako

A atraká bo kas òf kompania?

E ora ei bo por hasi un petishon pa un supsidio di máksimo Є 1.000* pa medida di seguridat pa prevení atrako nobo riba kas òf kompania.

Schadefonds Geweldsmisdrijven ta duna e supsidio aki i ta hasi esaki di parti di Minister di Hustisia i Siguridat. Ku e areglo aki, Minister di Hustisia i Siguridat ke yudá bo redusí e chèns ku ta atraká bo di nobo. Es desir for di investigashon a sali na kla ku personanan òf kompanianan atraká i ku despues no tuma medidanan (adishonal) di prevenshon, ta kore un riesgo mas grandi riba un atrako nobo.

*Ta stipulá e supsidio den Euro i deposit’é den US Dòler riba bo kuenta. E montante ku subi bo kuenta finalmente pues ta dependiente di e tipo di kambio.

Mi ta bin na remarke pa un supsidio?

Pa un supsidio bo mester kumpli ku e siguiente kondishonnan:

A asaltá bo kas òf kompania entre 1 di yanüari 2019 i 31 di desèmber 2021. A usa violensia òf a menasá ku violensia durante e atrako.
Bo a hasi denunsia di e atrako i bo por demostrá esaki ku un kopia di e denunsia.
Despues di e atrako bo a atkirí medidanan di siguridat pa prevení atrakonan nobo i bo por demostrá esaki ku un faktura.
Bo petishon mester ta entregá promé ku 1 di yüli 2022.

E areglo ta konta solamente si a usa violensia durente e atrako òf si a menasá ku violensia, por ehèmpel ku un kuchú òf arma di kandela. Si bo ta víktima di un kiebro òf ladronisia kaminda no a usa violensia òf no a menasá ku violensia, bo no por entregá un petishon.

Pa kua medidanan di siguridat mi ta haña un supsidio?

Tur medida ku ta dirigí pa prevení ku ta kometé un atrako di nobo, ta bini na remarke pa un supsidio.

Algun ehèmpel pa kas:

instalashon di bon iluminashon pafó,
instalashon di un sistema di alarma,
instalashon di hèkwèrk na bentana i porta,
instalashon di aparato pa mantené porta riba un skref.

Algun ehèmpel pa kompania:

instalashon di bon iluminashon pafó,
instalashon di un sistema di alarma,
instalashon di supervishon di kámara,
instalashon di un safe,
organisashon di entrenamentu kontra atrako pa e personal.

Kon mi ta pidi un supsidio?

Esaki por na dos manera:

Bo ta pasa na Ofisina Yudansa pa Víktima i nan ta entregá e petishon digitalmente pa bo.
Bo ta prent un formulario di petishon i manda esaki, huntu ku un kopia di bo pasport/sédula/reibeweis i tur otro rekisito nesesario, via pòst pa Schadefonds na Hulanda Oropeo. Bo por haña mas informashon tokante esaki riba e wèpsait www.schadefonds.nl

Schadefonds ta rekomendá bo pa entregá e petishon via Ofisina Yudansa pa Víktima. Esaki pasobra pòst for di Hulanda Karibense pa Hulanda Oropeo tin biaha por dura basta tempu. Ofisina Yudansa pa Víktima por entregá bo petishon digitalmente sin pèrdida di tempu.

Banda di esei Ofisina Yudansa pa Víktima tin eksperensia ku yenamentu di formulario di petishon i nan sa eksaktamente kiko ta importante pa Schadefonds. Tambe Ofisina Yudansa pa Víktima, na nòmber di Schadefonds, por kontrolá bo identidat dor di inspektá bo pasport/sédula/reibeweis na sitio.

Entregá petishon

Bo ta bai pasa serka Ofisina Yudansa pa Víktima? E ora ei nan ta entregá e petishon digitalmente pa bo. Sòru ku bo tin e siguiente dokumentonan serka bo:

kopia di bo prueba di identidat (pasport, sédula òf reibeweis)
kopia di e denunsia òf prosèsverbal
kopia di e faktura di e medidanan di siguridat tumá pa prevení un atrako nobo
kopia di tarheta di banko

Bo mes ta prent e formulario di petishon i mand’é bo mes via pòst? Agregá e mesun dokumentonan e ora ei. Schadefonds ta rekomendá bo pa entregá e petishon via Ofisina Yudansa pa Víktima.

Mas informashon

Preguntanan Hopi Hasí

Un oferta ta sufisiente pa tuma e petishon di supsidio den tratamentu?

Nò. Schadefonds tin mester di un faktura pa bo petishon. Esaki ta nifiká ku bo mes mester paga e montante promé.

Mi por entregá un petishon pa supsidio komo víktima di un kiebro?

Si bo ta víktima di un kiebro òf ladronisia, kaminda no a usa violensia òf no a menasá ku violensia, bo no por entregá un petishon pa supsidio. E areglo aki ta konta solamente si a usa violensia òf si a menasá ku violensia serka e atrako, por ehèmpel ku un kuchú òf arma di kandela. Bo por entregá un petishon e ora ei tambe pa un pago for di e Schadefonds regular. Wak riba e página Víktima pa esaki.

Mi por entregá un petishon komo víktima di un ladronisia riba kaya?

Nò. E atrako mester a tuma lugá den un kas òf kompania. Komo víktima di un ladronisia riba kaya bo por hasi un petishon sí pa un pago for di e Schadefonds regular. Wak riba e página Víktima pa esaki.

Bo tin otro pregunta?

E ora ei bo por tuma kontakto ku Ofisina Yudansa pa Víktima riba bo isla òf ku Schadefonds na Hulanda Oropeo.