Mi ta pariente di defuntu

Schadefonds Geweldsmisdrijven t’ei pa hendenan ku a pèrdè nan próhimo a konsekuensia di violensia òf morto pa motibu di un delito di kulpa. E organisashon Schadefonds Geweldsmisdrijven ta mantené e siguiente kondishonnan.

1.    Bo ta un pariente di defuntu (den sentido di e lei Wet schadefonds geweldsmisdrijven)


Komo pariente di defuntu bo por entregá un petishon den kaso ku bo kasá, partner (registrá), mayor, yu òf ruman a fayesé a konsekuensia di violensia òf morto pa motibu di un delito di kulpa.

2.    A. E víktima a muri a konsekuensia di un krímen violento intenshonal 

Komo pariente di defuntu bo por entregá un petishon den kaso ku e víktima a muri a konsekuensia di un krímen violento intenshonal. Un krímen violento intenshonal ta nifiká ku a usa violensia intenshonalmente, manera asesinato i homisidio.
Desgrasia no ta kai bou di esaki. Un ehèmpel: Un hende ta kana pasa i den su purá e ta dal den e víktima. Dor di esaki e ta kai di un manera desafortuná i fayesé. Esaki ta un desgrasia i no un krímen violento kometé intenshonalmente.


2B. E víktima ta fayesé a konsekuensia di morto pa motibu di un delito di kulpa


Komo pariente di defuntu bo por entregá un petishon den kaso ku e víktima a fayesé a konsekuensia di e asina yamá morto pa motibu di un delito di kulpa. Na Schadefonds pariente di defuntu ta bin na remarke den kaso ku nan a pèrdè nan próhimo dor di:

  • morto pa kulpa den tráfiko;
  • morto pa kulpa den sentido general.

Den kaso di kulpa den asuntunan di tráfiko (manera menshoná den artikulo 320 di Wetboek van Strafrecht BES) ta e komportashon di e sospechoso ta konta. Hopi bia un delito so no ta sufisiente pa por papia di kulpa. Por ehèmpel: si no a duna preferensia, hopi bia no ta sufisiente pa por papia di kulpa. Si e sospechoso sinembargo tabata kore demasiado duru i/òf a konsumí alkohòl, por papia mas lihé di morto pa kulpa.
Den kaso di kulpa den sentido general (manera menshoná den artíkulo 320 di Wetboek van Strafrecht BES) ta e komportashon di e sospechoso, e suseso i e sirkunstansianan ta konta.  Ehèmpelnan di kulpa den sentido general por ta:

  • venenamentu ku monóksido di karbon;
  • aksidente ku arma di kandela;
  • erornan médiko.

Aksidentenan riba nan mes no ta sufisiente pa por papia di morto pa kulpa. Morto pa kulpa ta trata di komportashon deskuidá: e sospechoso por a sa ku algu por a bai robes, pero tòg el a sigui hasié.


3.    E krímen violento òf morto pa motibu di un delito di kulpa a tuma lugá den Hulanda Karibense 


E krímen violento òf morto pa motibu di un delito di kulpa mester a sosodé den Hulanda Karibense. Si el a tuma lugá abordo di un barku òf avion Hulanda Karibense, tambe bo por bin na remarke na Schadefonds. E víktima no tabata biba na Hulanda Karibense, pero a muri akinan pa motibu di un krímen violento òf morto pa motibu di un delito di kulpa? E ora ei tambe bo por entregá un petishon na Schadefonds. 
Pariente di víktima ku a muri a konsekuensia di krímen violento òf morto pa motibu di un delito di kulpa, ku a wòrdu kometé den Hulanda Oropeo, nos ta referí na www.schadefonds.nl.

4.    Abo òf e víktima no a tuma parti den e krímen 


Solamente si abo òf e víktima mes no tabata kulpabel na e krímen, bo por risibí e kompensashon di un solo bia. Na momentu ku ta analisá kiko a pasa, ta bai wak tambe kiko bo ròl i e esun di e víktima tabata. Den kaso ku bo òf e víktima tin parti den e krímen violento ta posibel ku bo no ta haña kompensashon. Ehèmpelnan ta:

  • si bo òf e víktima a usa violensia promé;
  • si bo i/òf e víktima tabata okupá boso mes ku aktividatnan kriminal (manera bendementu di droga).

5.    No ta paga e daño di otro manera


Bo ta haña kompensashon di Schadefonds solamente si e malechor òf un kompania di seguro no a kubri e daño . Den sierto kaso kasi semper bo tin derecho riba kompensashon di e kompania di seguro. Por lesa mas tokante di esaki bou di kondishon 1.

Sí, bo por apliká na Schadefonds si bo no sa si bo ta bai haña sèn di otronan. Si al final tòg bo risibí kompensashon di e malechor òf kompania di seguro, por ta asina ku bo tin ku paga bèk e suma risibí di Schadefonds.

Den su desishon Schadefonds por tene kuenta tambe ku e suma ku e malechor òf kompania di seguro tin ku pagá bo. E ora ei bo no tin ku paga bèk despues.