Mi ta un próhimo

1.    Bo ta próhimo

Komo próhimo bo por entregá un petishon si bo kasá, partner(registrá), mayor, yu òf ruman tin leshon grave i permanente pa motibu di un krímen violento.

2.    Ta trata di un kaso di krímen violento intenshonal 

Bo ta próhimo di un víktima di un krímen kometé intenshonalmente. Esaki ta nifiká ku a usa violensia intenshonalmente kontra e víktima òf a menas’é ku esaki. Aki nos por pensa riba:

• intento di asesinato/homisidio;
• maltrato físiko;
• menasa di violensia i/òf ku un arma.
• Desgrasia no ta kai bou di esaki.

3.    Ta trata di leshon grave i permanente a konsekuensia di e krímen di violensia

Esaki por ta físiko i/òf síkiko. Schadefonds ta konsiderá  un leshon ‘grave i permanente’  ora e víktima no por funshoná por lo ménos pa 70% físikamente. Leshon síkiko tambe por ta grave i permanente. 

Leshon permanente ke men ku no tin prospekto ku e leshon (òf e konsekuensia di esaki) despues di tempu ta bira ménos. E buèlta ku e bida di e víktima i e próhimo a tuma ta hopi importante pa nos revishon. E punto ta ku e konsekuensianan di e krímen violento a afektá e próhimo severamente. 

Algun ehèmpel di esaki ta:

• pèrdida di bista (kompletamente siegu)
• parálisis (‘dwarslaesie’)
• pèrdida di tur dos brasa 
• leshon selebral di un índole grave i kambio di komportamentu 
• kemaduranan di terser grado riba gran parti di e kurpa 
• leshon físiko òf síkiko di tal manera ku e víktima no por sòru pa su mes mas 

4.    E krímen violento a tuma lugá den Hulanda Karibense 

E krímen violento mester a sosodé den Hulanda Karibense. Si e krímen violento a sosodé a bordo di un barku òf avion Hulanda Karibense, tambe bo por bini na remarke serka Schadefonds. Bo no ta biba den Hulanda Karibense, pero bo próhimo a bira víktima di violensia akinan? E ora ei tambe bo por entregá un petishon. Próhimonan di víktima di krímen violento ku a tuma lugá den Hulanda Oropeo nos ta referí na wèpsait www.schadefonds.nl.

5.    Ni abo ni e víktima no tabatin parti den e krímen 

Bo por haña un pago di un solo bia si abo òf e víktima no tabata kulpabel na e krímen. Ta asina ku ta bai wak bo ròl i esun di e víktima tambe den loke a pasa. Si akaso bo òf e víktima a tuma parti den e krímen violento, tin posibilidat ku bo no ta risibí e kompensashon. 

Algun ehèmpel:

• si bo òf e víktima a usa violensia promé; 
• si bo i/òf víktima tabata okupá boso mes ku aktividatnan kriminal (manera bendementu di droga).

6.    No ta paga e daño di otro manera 

Bo ta haña kompensashon di Schadefonds solamente si e malechor òf un kompania di seguro no a kubri e daño. 

Sí, bo por apliká na Schadefonds si bo no sa si bo ta bai haña sèn di otronan. Si al final tòg bo risibí kompensashon di e malechor òf kompania di seguro, por ta asina ku bo tin ku paga bèk e suma risibí di Schadefonds.

Den su desishon Schadefonds por tene kuenta tambe ku e suma ku e malechor tin ku pagá bo. E ora ei bo no tin nodi di paga bèk despues.

7.    Fecha di e krímen

Komo próhimo bo por únikamente hasi petishon pa e kompensashon si e krímen violento a sosodé riba òf despues di promé di yanüari 2019.