Mi ta víktima di violensia

1.    Bo ta víktima di krímen violento kometé intenshonalmente

Mester ta trata di un un krímen violento kometé intenshonalmente. Esaki ta nifiká ku e violensia kontra bo tabata intenshonal òf a menasá bo ku esaki. Aki por pensa riba:

• maltrato físiko
• ladronisia ku violensia (manera atrako na kas, den negoshi òf riba kaya) 
• menasa ku violensia i/òf un arma
• violashon i agreshon seksual (ofensanan seksual)
• violensia doméstiko
• stalking
• pegamentu di kandela kaminda e víktima a kore peliger 
• trafikashon di hende 

Desgrasia no ta kai bou di esaki. Un ehèmpel: Un hende den su purá ta kana dal den bo. Dor di esaki bo ta kai i kibra bo pia. Esaki ta un desgrasia, e no ta un krímen violento intenshonal.

2.    Bo tin òf tabatin leshon grave dor di e krímen violento 

Schadefonds t’ei pa víktima ku leshon grave. Esaki por ta leshon físiko i/òf mental (síkiko). Pa Schadefonds un leshon ta konsiderá grave ora bo a risibí tratamentu médiko diferente bia, e rekuperashon a òf ta tarda òf e no ta posibel mas. Algun ehèmpel di esakinan ta:

• un pia òf man kibrá ku a rekerí un operashon
• pèrdida permanente di holó i/òf smak 
• pèrdida di un djente, kis òf wowo
• un trastorno di stress postroumátiko

Schadefonds mester di dokumentunan médiko tokante bo problemanan físiko i/òf síkiko. Pa problemanan síkiko ta wak si bo ta bou di tratamentu serka un spesialista ku registrashon BIG, ku marka di servisio NIP ku nota básiko di sikodiagnóstiko (BAPD), ku registrashon NVO ku nota básiko di diagnostiká (BAD) òf un kontrato ku e Ofisina di Kuido Médiko. Bo por puntra esun ku ta tratá bo pa esaki. 

Pa sierto krímen violento Schadefonds semper ta asumí ku bo tin un leshon síkiko grave: por ehèmpel den kaso di agreshon seksual òf violashon, violensia doméstiko, i menasa ku kuchú òf arma di kandela. Den e kasonan aki bo no mester ta bou di tratamentu di un sikólogo òf sikiater pa por haña un kompensashon. Esaki ta yamá  ‘suposishon di leshon grave’.

Schadefonds ta traha huntu ku konseheronan médiko. Nan ta wak e informashon médiko ku bo a agregá (dokumentonan di bo dòkter òf esun ku ta trata bo ku informashon tokante bo keho/leshon). Esaki nan ta usa pa determiná si ta trata di un leshon grave. Den sierto kaso tambe nan por pidi informashon médiko èkstra serka bo dòkter di kas òf esun ku ta tratá bo. Esaki nan ta hasi solamente ku bo konsentimentu.

Pa por evaluá e leshon, Schadefonds ta usa solamente informashon di e spesialistanan ku tin un ku registrashon BIG, ku marka di servisio NIP ku nota básiko di sikodiagnóstiko (BAPD), ku registrashon NVO ku nota básiko di diagnostiká (BAD) òf un kontrato ku e Ofisina di Kuido Médiko. E instrukshonnan pa determiná e leshon ta inkluí den un lista di leshon. E lista di leshon ta duna un bista kua ta e leshonnan mas komun i kua ta e kompensashon ku ta aplikabel pa esaki.

3.    E krímen violento a tuma lugá den Hulanda Karibense

E krímen violento mester a sosodé den Hulanda Karibense. Si e krímen violento a sosodé a bordo di un barku òf avion Hulanda Karibense, tambe bo por bin na remarke serka Schadefonds. Si bo no ta biba den Hulanda Karibense, pero a bira víktima di violensia aki, tambe bo por hasi un petishon. Víktima di krímen violento ku a tuma lugá na Hulanda Oropeo, nos ta referí na e wèpsait www.schadefonds.nl.

4.    Bo no a forma parti di e krímen violento

Lo wak bo propio ròl den lokual a sosodé. Ehèmpelnan ta: 

• si ta bo a usa violensia promé ;
• si bo a provoká e otro;
• si bo ta okupá bo mes ku aktividatnan kriminal (manera bendementu di droga). 

Si bo tin parti den e krímen violento ta posibel ku bo no ta risibí nada òf bo ta risibí un kompensashon mas abou.

5.    No ta kompensá e daño di otro manera

Bo ta haña kompensashon di Schadefonds solamente si e daño no ta kubrí dor di e malechor òf dor di un kompania di seguro. Sí, bo por apliká na Schadefonds si bo no sa si bo ta bai haña sèn di otronan. Si al final tòg bo risibí kompensashon di e malechor òf kompania di seguro, por ta asina ku bo tin ku paga bèk e suma risibí di Schadefonds.

Den su desishon, Schadefonds por tene kuenta tambe ku e suma ku e malechor tin ku pagá bo. E ora ei bo no tin nodi di paga bèk despues.