Funshonnan di TOP Trainee

Komo konsehero di HR bo ta e punto di kontakto pa empleado- i mènedjernan riba tereno di rekurso humano. Bo ta sostené proseso di reklutashon i selekshon, ehekushon di e maneho di HR i bo ta konsehá tokante kondishon di trabou, ousensia i maneho di prestashon. Bo tin un ròl importante den krea un ambiente di trabou positivo i bo ta traha huntu ku e tim di maneho pa alkansá metanan stratégiko di personal.

Komo konsehero di komunikashon bo ta responsabel pa desaroyá i ehekutá e maneho di komunikashon den e organisashon. Bo ta sòru pa komunikashon interno i eksterno, skirbi komunikado di prensa i ta kordiná kampaña. Ademas bo ta konsehá e tim di maneho tokante strategia di komunikashon, por ehèmpel den situashon di krísis. Bo ta sòru pa e mensahe di e organisashon yega di e manera korekto serka e gruponan

Komo kolaboradó di desishon na IND CN bo ta responsabel pa evaluá petishon di estadia i petishon di nashonalidat hulandes kuidadosamente. Aki bo ta analisá e aspektonan hurídiko i relevansia di e petishonnan. Bo ta formulá konseho, traha konsepto di desishon i ta atendé karta di opheshon, inkluso plania oudiensia i traha rapòrt. Ademas bo ta e punto di kontakto pa informashon tokante maneho di estranhero i bo ta traha proaktivo na mehorashon den e organisashon.

Komo profeshonal di kuido pa hóben bo ta ehekutá medida di protekshon pa mucha i huntu ku mayornan bo ta traha un plan di akshon pa garantisá seguridat i desaroyo di e muchanan. Bo ta duna sosten na famianan di kriansa i ta kordiná e ayudo nesesario i kuido den e situashon na kas.

Komo spesialista fiskal bo ta responsabel pa evaluá i kontrolá deklarashon di impuesto, konsehá siudadano- i kompanianan. Bo ta sigurá ku esnan konserní ta kumpli ku regulashon fiskal. Tambe bo ta dirigí proyekto, desaroyá métodonan nobo i sistemanan pa trein kolega den e proseso di impuesto.

Komo konsehero di maneho den e área sosial bo ta kontribuí na dokumentonan di maneho, diseño di proyekto i presupuesto. Bo ta ehekutá investigashon riba e grupo di enfoke LVB i nesesidat di bibienda di seis grupo vulnerabel na Boneiru. Aki bo ta kompilá dato, analisá esakinan i ta enbolbí ‘stakeholders’. Ademas bo ta fasilitá seshon di partisipashon i ta raportá tokante resultadonan ku rekomendashon di maneho konkreto.

Komo konsehero di maneho di vitalidat bo ta konsentrá riba promové salú i bienestar di empleadonan. Bo ta desaroyá i implementá maneho i programa ku ta mehorá vitalidat i plaser di trabou di empleadonan. Ademas bo ta analisá trènt, kordiná ku stakeholders i raportá tokante efektividat di diferente inisiativa.

Komo kordinadó preparashon operashonal i maneho di rísiko na brantwer bo ta responsabel pa desaroyá, implementá i monitoriá maneho riba tereno di maneho di rísiko. Bo ta kordiná ehekushon di plan di kombate pa insidente i mapa di aksesibilidat i ta kordiná e suministro di awa pa paga kandela. Tambe bo ta sòru pa kapasidat profeshonal di personal, bo ta duna guia funshonal, ta vigilá e koherensia di proseso di trabou i bo ta kordiná ku partnernan eksterno.

Komo konsehero hurídiko juniòr bo ta sostené ku trahamentu i kòntròl di dokumentonan hurídiko. Bo ta duna konseho tokante regulashon i legislashon, i ta kontribuí na solushoná problema hurídiko den e organisashon. Bo ta traha estrechamente huntu ku konseheronan seniòr i otro departamentu pa limitá rísiko i pa garantisá toma di desishon legalmente korekto.

Komo kolaboradó di maneho di outomatisashon bo ta responsabel pa desaroyá, evaluá i implementá maneho riba tereno di digitalisashon i IT den e organisashon. Bo ta sigui desaroyonan teknológiko, konsehá gerensia tokante strategianan di outomatisashon i ta sòru pa tradukshon di metanan di maneho na solushon práktiko di IT.