Estudio pa trahadónan nobo di brantwer via un sistema nobo
Riba 28 di yanüari Kuerpo di bombero Hulanda Karibense (BKCN) a start ku e estudio pa 12 kolega nobo den e kuerpo; 3 for di Saba, 2 for di Sint Eustatius i 7 for di Boneiru. Den 6 luna ta kapasitá e partisipantenan komo Manschap-A, unda nan ta siña tokante di kombatimentu di kandela, ayudo tékniko i aksidente ku supstansianan peligroso. Djis despues den novèmber e estudio kombatimentu di kandela di avion tambe mester keda finalisá, kaminda despues e koleganan ta disponibel den BKCN.
E estudio no ta tuma lugá mas for di buki pero via di e asina yamá “elektronische leeromgeving” (ELO). Ta siña e teoria via di kòmpiuter i internèt a base di video, animashon, tekstonan kòrtiku, storianan papiá i ‘quiz’ pa kontrolá si ta komprondé kontenido di e lès. Durante di momentunan di práktika e teoria ta ser poné den práktika via di “blended learning’. Akinan diferente manera pa traha ta bini dilanti pa asina prepará e partisipantenan mas mihó posibel riba empeño realístiko di brantwer. Tambe e partisipantenan mester realisá tareanan independientemente pa asina konosé e profeshon di bombero i e organisashon mas mihó. Pa kada parti di e estudio ta tene reunionnan di progreso i pruebanan interino pa supervisá e progreso di e partisipantenan. Ta konkluí e módulonan ku un eksámen práktiko.
Propio instruktornan di BKCN ta duna e estudio aki bou di guia di Julius Melaan, hefe di departamento di estudionan di BKCN. Di aleu BKCN ta haña sosten di e instituto pa estudionan di brantwer BOGO for di Hulanda. Pa e partinan médiko tin sosten for di Fundashon Mariadal i durante di eksámen for di kuerpo di bombero Sint Maarten.
Banda di e kontenido tékniko tambe ta dediká tempu na hasi deporte i abilidat pa landa. E partisipantenan ta pasa un tèst médiko, un tèst di deporte pisá dirigí riba brantwer i nan mester logra optené nan diploma di landamentu pa al final nan por traha na BKCN.
E rekapasitashon i estudio ta eksiguí hopi di BKCN i su trahadónan. Sinembargo, dor di e invershonnan aki BKCN ta keda ‘up-to-date’ ora ta trata di estudionan i asina BKCN ta keda konektá ku e desaroyonan di estudio di Brantwer di Hulanda. Bomberonan bon entrená ta kontribuí na siguridat di habitantenan di Hulanda Karibense i al final esei ta loke BKCN ta boga p’e.