CBS: Tres kuart di hóbennan ku no ta siguiendo enseñansa na Boneiru ta traha

Notisia | 21-02-2018 | 15:58

Mayoria di hóbennan na Hulanda Karibense den edat di 15 te 25 aña tabata sigui enseñansa den 2016. Na Saba e parti aki ku 72 porshento ta esun di mas grandi. Na Boneiru un terser parti di e hóbennan no ta sigui enseñansa mas, pero ta trahando. E hóben boneriano aki tin práktikamente mesun tantu bia un trabou fultaim komo esnan di 25 aña òf mas i ta trahando relativamente frekuente komo bendedó. Asina CBS ta informá basá riba sifranan nobo.

E motibu ku na Saba relativamente hopi hóben ta sigui enseñansa, tin di aber ku presensia di un instituto di enseñansa médiko riba e isla. Un kuart di tur esnan di 15 te 25 aña di edat na Saba a nase na Canada òf Estádos Unídos. Esakinan ta partikularmente studiantenan di medisina. Den 2016 2.110 hóben den e edat di 15 te 25 aña tabata biba na Boneiru. Na Sint Eustatius i Saba tabata biba respektivamente 300 i 280 hóben.

Situashon di merkado labor pa hobennan pa isla

Un kuart di hóbennan na Sint Eustatius no ta sigui enseñansa i no ta traha

Na Sint Eustatius e parti di hóben ku no ta sigui enseñansa i no ta traha ta ku 26 porshento esun di mas grandi. Na Boneiru i Saba e parti aki ta respektivamente 11 porshento i 8 porshento.
Di e bonerianonan di 15 te 25 aña, 33 porshento no tabata sigui enseñansa (mas) den 2016, pero tabata traha si; na Saba i Sint Eustatius tabata trata aki di respektivamente 20 porshento i 13 porshento di e hóbennan. E kantidat di hóben trahando ku no ta siguiendo enseñansa na Saba i Sint Eustatius ta muchu chikitu pa por bisa algu al respekto.

Partisipashon laboral di hóbennan boneriano ku no ta siguiendo enseñansa ta 76 porshento

Di e hóbennan ku no ta siguiendo enseñansa na Boneiru mas di tres kuart ta trahando. Ku esaki e partisipashon laboral ta mas abou ku bou di esnan di 25 te 45 aña (85 porshento) ku no ta siguiendo enseñansa pero ta mas haltu ku bou di esnan di 45 te 75 aña. Di esnan di 45 aña di edat òf mas, ku no ta siguiendo enseñansa, 65 porshento tabata trahando den 2016.

Partisipashon laboral neto di esnan ku no ta sigui enseñansa na Boneiru

Na Boneiru hóbennan ku ta traha hopi bia tin trabou fultaim

Na Boneiru hóbennan ku no ta siguiendo enseñansa ta traha praktikamente mes tantu bia fultaim ku esnan di mas edat ku ta trahando i no ta siguiendo enseñansa. Den 2016, 85 porshento di e hóbennan tabata traha 35 ora òf mas pa siman. Pa esnan di 25 te 45 aña di edat i di 45 te 75 aña di edat esaki tabata respektivamente 88 porshento i 84 porshento. Banda di esei, di e hóbennan ku no ta siguiendo enseñansa, 7 porshento tabata traha un trabou partaim grandi di 28 te 35 ora pa siman. Un parti mas chikitu di 5 porshento tabata traha ménos ku 12 ora pa siman.

Durashon laboral di hobennan ku no ta sigui enseñansa

Un kuart di e hóbennan na Boneiru trahando ku no ta siguiendo enseñansa, ta ehersé un okupashon komersial, por ehèmpel komo bendedó. Hóbennan ta hasi esaki mas frekuente ku esnan di mas edat ku ta traha. Ademas 18 porshento di e hóbennan tin un okupashon ekonómiko empresarial òf atministrativo (por ehèmpel kolaboradónan atministrativo, kolaboradónan di kontabilidat òf sekretaria). Hóbennan, ku ménos frekuensia kompará ku personanan di mas edat ku ta trahando, tin un okupashon tékniko manera entre otro trahadó den konstrukshon.

Esnan ku ta trahando ku no ta sigui enseñansa segun klase profeshonal

CBS riba enkargo di ministerio di Salubridat, Bienestar i Deporte (VWS) ta desaroyá un asina yamá ‘Jeugdmonitor’ Hulanda Karibense. E monitor ta relatá na e Landelijke Jeugdmonitor (monitor nashonal di hubentut), un instrumento ku CBS ta manehá tambe pa VWS. E informashon aki tokante partisipashon laboral di hóbennan ku no ta siguiendo enseñansa a keda publiká den kuadro di e ‘Jeugdmonitor’ Hulanda Karibense. Por haña e sifranan korespondiente tokante partisipashon laboral di hóbennan riba e islanan den e ‘Jeugdmonitor StatLine’ bou di e tema Hulanda Karibense. Esaki ta e promé tabèl kompilá tokante Hulanda Karibense. Den e promé mitar di 2018 lo publiká mas sifra tokante hóbennan na Hulanda Karibense manera partisipashon den enseñansa i bakunashon.