Hulanda ta fortifiká e fondo di penshun PCN ku 31 mion dòler

E kombenio ta resultado di e kombersashonnan entre PCN i e ministerio di Asuntunan Interno i Relashonnan den Reino (BZK),ministerio kordinado pa Gabinete Hulandes. E Gabinete Hulandes, komo dunadó di trabou di gobierno, ta sinti su mes responsabel pa  e penshun di e ámbtenarnan di Rijksdienst Caribisch Nederland, Entidatnan Públiko, skolnan i institutonan di kuido na Hulanda Karibense. Despues di preparashonnan di e tòp atministrativo i e direktiva di PCN, Sekretario di Estado, Knops, a duna su aprobashon ofisial pa e palabrashonnan ku a hasi.

Aporte èkstra

Konforme e kombenio PCN ta risibí un suma di 25 mion dòler pa un solo biaha promé ku fin di 2018, miéntras ku, kuminsando for di 2018,  durante un periodo di 6 aña, lo transladá 1 mion dòler mas anualmente pa e fondo komo aporte èkstra. Hulanda ta reforsá e penshun di PCN ku total 31 mion doler di parti di BZK. E montantenan ta bin riba e prima ku dunadónan di trabou i trahadónan ta generá konhuntamente.

Konsiderashon

E konsiderashon prinsipal pa a yega na fortifikashon di e kapital ta e echo ku, for di  aña 2010 na momentu ku a lanta e fondo di penshun, ela hañ’é konfrontá ku algun situashonnan spesífiko difísil. Ta asina ku PCN ta un fondo di penshun chikitu ku prinsipalmente tin di haber ku merkadonan finansiero merikano. E fondo ta e úniko fondo di penshun ku ta kai bou di e regulashon ku a skirbi spesífikamente pa Hulanda Karibense. Dor di entre otro e karakterístikanan spesífiko aki, e fondo a kai den un estado di kobertura negativo dor di kua e kòrtamentu den e pago di penshun i derecho di penshun di 3,5% desde aprel 2017, tabata nesesario. 

Durante e palabrashonnan aki a wak tambe e durabilidat di e fondo pa futuro. Den e temporada benidero lo sigui hiba kombersashonnan tokante di esaki ku entre otro e sindikatonan.