Kon mi ta pidi outoridat di mayor?
Mayornan por hasi un petishon pa outoridat konhunto serka Konseho di Tutela CN ora nan yu ta registrá na Hulanda Karibense i ora ta kumpli ku e siguiente kondishonnan:
- E menor di edat a nase for di e relashon entre tur dos mayor;
- Pa lei, e mama tin e outoridat di mayor riba e yu menor di edat;
- E petishonarionan no ta(bata) kasá ku otro;
- E petishonarionan no a ehersé outoridat konhunto riba e menor di edat promé;
- E mama ta bai di akuerdo pa kompartí outoridat di mayor riba yu(nan) menor di edat huntu ku e tata;
- E tata ta dispuesto pa aseptá e outoridat (konhunto) riba e yu(nan) menor di edat.
Konseho di Tutela ta kuminsá traha riba bo petishon i ta redaktá dokumentashon ku lokual bo por entregá e petishon pa outoridat konhunto den korte. Esaki yama un petishon.
Entrega di e petishon serka Konseho di Tutela CN ta posibel durante ora di konsulta. Ora no ta posibel pa bo bini Konseho di Tutela durante ora di konsulta, bo por yama Konseho di Tutela na telefòn i hasi un sita na bo lokalidat. Ora e petishon ta kla, tur dos mayor mester bini Konseho di Tutela pa firma e dokumentonan.
Pa e petishon, bo mester trese e siguiente dokumentonan komo duplikado:
- Ekstrakto di registro sivil di tur dos mayor.
- E akta di nasementu di e yu.
- E akta di rekonosementu di e yu menor di edat.
Bo por yena e petishon, e akuerdo di konformidat (mama) i e akuerdo di disponibilidat (tata) bo mes tambe i entreg’é na korte. Por haña un ‘template’ pa e petishon i e deklarashonnan nesesario aki (na Hulandes).
Paga tinu: Bo mester entregá tur dokumento i anekso nesesario komo duplikado na korte, inkluso e aktanan resien for di registro sivil, e akta di nasementu di e yu i e akta di rekonosementu di e yu menor di edat.