Peskeria
E ministerio di LNV ta responsabel pa un bon maneho di peskeria komersial den e zona ekonómiko eksklusivo (EEZ) di Hulanda Karibense i tin huntu ku e Entidatnan Públiko e responsabilidat di e peskeria den e awanan teritorial. Pa e maneho di peskeria ta traha huntu ku otro paisnan di Reino, Kòrsou, Aruba i Sint Maarten. E kolaborashon aki ta tuma lugá den e asina yamá EZZ-Commissie (Komishon di EEZ).
Plan di maneho di peskeria di Hulanda Karibense
E plan di maneho di Peskeria di Hulanda Karibense bou di e título ‘Sustainable Fisheries Plan Caribbean Netherlands 2020-2030’ (Plan di Peskeria sostenibel di Hulanda Karibense 2020-2030), ta e kuadro pa e maneho di peskeria den Hulanda Karibense. E ta trata e periodo 2020-2030 i ta parti di e Plan di maneho pa Naturalesa i Medio ambiente di Hulanda Karibense 2020-2030. E vishon den e plan aki pa Peskeria den Hulanda Karibense ta “To develop a sustainable and profitable fishery, aimed at conserving the natural environment and ensuring food security in the Caribbean Netherlands, for the benefit of its biodiversity, its residents, the local economy, and future generations.” (Pa desaroyá peskeria na un manera sostenibel i lukrativo, dirigí riba konservashon di e entorno natural i segurando siguridat di kuminda den Hulanda Karibense, na benefisio di su biodiversidat, su habitantenan, e ekonomia lokal, i e futuro generashonnan).
Regla i pèrmitnan
Pa por piska den EEZ i pa piska ku botonan mas grandi ku 12 meter den e awanan teritorial di Hulanda Karibense ta eksigí un pèrmit di minister di LNV. Ta ekseptuá botonan, ku ta piska ku un máksimo di kuater liña, di e pèrmit obligatorio aki. E Entidatnan Públiko di Boneiru, Sint Eustatius i Saba tin e outoridat pa determiná reglanan adishonal i maneho pa peskeria den e awanan teritorial.
Den e Visserijwet BES (Lei di Peskeria BES) i e Visserijbesluit BES (Desishon di peskeria BES) a inkluí reglanan pa lo ke ta trata e espesienan ku mag di kue i e materialnan ku mag di piska kuné. Banda di esaki ta prohibí pa piska sierto espesie a base di lei i legislashon di naturalesa. E EEZ di Hulanda Karibense ta designá komo e reserva di Yarari pa mamífero di laman, tribon i mantanan. Un bista general di e lei i legislashon bo ta haña aki.
E Komishon di Peskeria BES ta konsehá minister riba aplikashonnan di pèrmitnan pa piska i e maneho di e peskeria den Hulanda Karibense. E Komishon di Peskeria BES ta konsistí di representantenan di kada un di e tres islanan, plùs un presidente independiente. E ministerio di LNV ta dirigí e sekretariado. E resúmennan di e reunionnan di e komishon aki bo ta haña aki.