A aktualisá método pa kalkulá alimentashon pa yu
Desde 2022 ta hasi uso di un modelo nobo di kalkulashon pa determiná alimentashon pa yu a base di kua Voogdijraad Hulanda Karibense ta konsehá Korte. Anualmente ta aktualisá e modelo di kalkulashon akí. E aña akí kambio den suèldu mínimo, kompensashon pa yu i kosto di bida ta afektá e modelo nobo.
Pa determiná altura di e alimentashon pa yu, Voogdijraad CN ta apliká un modelo di kalkulashon. Den e modelo di kalkulashon akí ta determiná promé kapasidat finansiero di e mayornan i nesesidat di e yu(nan), basá riba standartnan insular i investigashon di mínimo sosial. Basá riba ámbos resultado i un korekshon pa kompensashon pa yu, ta determiná e alimentashon pa yu pa ámbos mayor. Despues ta wak kuantu dia e yu ta keda serka e tata òf mama i ta kalkulá e suma di alimentashon final.
E modelo mester keda aktualisá pa e tin balor pa hustisia. Pa e motibu aki ta hasi anualmente un evaluashon di e modelo. Ku tur e kambionan den e sumanan standart pa por ehèmpel suèldu i kompensashon pa yu i e investigashon resien di e mínimo sosial na Hulanda Karibense, a aktualisá tambe e montantenan ku ta na vigor entrante promé di yanüari 2024 den e modelo di kalkulashon di alimentashon pa yu.
Kalkulashon di nobo di alimentashon
Petishon pa un kalkulashon nobo di un suma di alimentashon konsedé kaba ta solamente posibel, si tin motibu bálido pa hasi esei. Pues ku e situashon di e mucha, e persona ku tin derecho riba alimentashon òf e persona ku mester paga alimentashon mester a kambia strukturalmente, pa por pidi un kalkulashon nobo. Asina por ehèmpel retiro, kambio di trabou i entrada, òf un kambio den konstelashon di un famia òf lugá di estadia prinsipal di e yu por ta motibu pa hasi petishon pa un kalkulashon nobo. Pa esaki mester entregá prueba tambe. Entregá un petishon pa motibu ku un persona ku ta obligá di paga alimentashon kier paga ménos no ta sufisiente pa pidi un kalkulashon nobo.
Mas informashon
Por haña mas informashon tokante petishon di alimentashon pa yu i e modelo di kalkulashon di alimentashon pa yu riba e wèpsait www.rijksdienstcn.com.
Pa petishon di alimentashon pa yu òf kalkulashon nobo mayornan por akudí serka Voogdijraad CN riba e isla na unda e yu ta inskribí.