Mayornan di mucha te ku 21 aña huntu ta responsabel pa gastunan pa kuido i kriansa. Esaki ta konta despues di un divorsio tambe. Si mayornan separá mester sera akuerdo tokante e kontribushon finansiero na gastunan pa supsistensia di e yunan. E kontribushon finansiero aki yama alimentashon pa yu.
Hopi bia eks partnernan huntu ta sera akuerdo tokante e alimentashon pa yu. Pero ora mayornan no por yega na un akuerdo tokante un areglo di alimentashon entre nan, hues por stipulá un montante. Den e kaso ei Voogdijraad CN (Konseho di Tutela CN) ta hasi un kalkulashon i ta entregá un petishon serka hues na nòmber di un òf di tur dos mayor. Voogdijraad ta kalkulá kiko tin mester pa supsistensia di (e) yu(nan) i kuantu tur dos mayor por gasta. A base di esaki ta konsehá e hues e montante di mas adekuá i realista. Na final di kuenta e hues ta disidí si ta konsedé alimentashon pa yu i kon haltu e montante ta.
Ora e hues a tuma un desishon, un di e mayornan tin obligashon pa paga e otro mayor un montante pa e yunan. E montante por kambia solamente si un di e dos mayornan pidi un kambio. E ora ei Voogdijraad ta bolbe hasi un kalkulashon i e hues ta bolbe tuma un desishon tokante e alimentashon pa yu.
Paso pa paso
Kiko ta pasa ora di un petishon pa Alimentashon pa yu?
Por entregá petishon pa alimentashon pa yu na Voogdijraad CN den e pais unda e mucha ta registrá. Por entregá petishon pa alimentashon pa yu via e-mail voogdijraadbes@rijksdienstcn.com òf personalmente durante ora di konsulta di Voogdijraad CN riba djamars i djaweps entre 9 or i 11 or di mainta. Si bo no por bini Voogdijraad CN durante ora di konsulta, bo por hasi un sita telefóniko ku un empleado di Voogdijraad CN na bo lokalidat.
A base di entrada i gastu di tur dos mayor Voogdijraad ta hasi un kalkulashon ku un modelo di kalkulashon fiho. Ei den ta tene kuenta ku e nesesidat di mucha(nan), kuantu yu e tata i mama tin, kuantu yu nan tin huntu i kon largu e yu(nan) ta keda serka tur dos mayor. A base di esaki Voogdijraad ta saka un konseho ku un lista di kosto i kalkulashon di e alimentashon pa yu. Ta inkluí e konseho aki den e karta di petishon.
Despues di e investigashon e empleado di alimentashon ta diskutí e konseho i e karta di petishon ku e mayornan. Ta pidi e mayornan pa firma un deklarashon pa konsultá e konseho. Mayornan semper por trese un persona di konfiansa òf nan por laga un abogado asistí nan.
Voogdijraad ta entregá e karta di petishon ku posibel aneksonan na korte. Esei ta grátis. Despues korte ta stipulá un fecha riba kua un enkuentro ta tuma lugá na korte. Esaki yama e seshon den korte. E mayornan ta haña un invitashon pa esaki. E empleado di alimentashon di Voogdijraad tambe ta presente na e seshon. Durante e seshon e hues ta hasi pregunta na e mayornan i ta diskutí kontenido di e karta di petishon.
Na final di e seshon e hues ta stipulá e fecha riba kua lo pronunsiá e sentensia. Ta pone e desishon òf sentensia di e hues riba papel komo un disposishon. E mayornan tur dos por apelá kontra e disposishon aki di e hues.
Ora risibí e disposishon, Voogdijraad lo manda un kopia pa kada mayor. E ora ei Voogdijraad ta sòru pa transferí e informashon korekto na Ofisina di Impuesto Hulanda Karibense. Ofisina di Impuesto ta pèrkurá pa kobransa i pago di alimentashon pa yu. E mayor ku mester paga ta haña un karta ku e datonan di pago i e number di kuenta bankario di Ofisina di Impuesto, unda e mester depositá pagonan pa Alimentashon pa yu. Ta pidi e mayor ku mester risibí pago, pa entregá su datonan di banko na Ofisina di Impuesto.
Paga tinu: E mayor ku mester paga alimentashon pa yu ta responsabel pa e pago. E mayor aki ta risibí un máksimo di 2 rekordatorio (aanmaning) di Ofisina di Impuesto. Despues Voogdijraad CN ta outorisá pa pone beslag riba sueldo di e mayor ku no ta paga. Den kaso ekstremo Voogdijraad por kontratá un deurwaarder, riba petishon di e mayor ku mester risibí e pago. Voogdijraad lo paga e gastunan di e deurwaarder pa redakshon i entrega di e dwangbevel (òrdu di gobièrnu pa paga). E gastunan pa pone beslag lo kore pa kuenta di e mayornan.