Di dos kompensashon pa mucha ku kuido intensivo
Mayor- i mayornan di kriansa di muchanan di 3 te ku 17 aña ku tin mester di kuido intensivo na Hulanda Karibense, ta bin na remarke pa un (di dos) kompensashon un biaha di 2.259 dòler bruto. E kompensashon aki ta pa kompensá e kompensashon struktural pa yu dòbel ku lo keda introdusí despues, asina ku finalisá e trayekto legislativo. Mayor-/i mayornan di kriansa ku a risibí e kompensashon aña pasa i ku ainda ta kumpli ku e kondishonnan pa kompensashon pa yu, no tin mester di hasi un petishon di nobo. Nan risibí un karta kaba tokante esaki.
E areglo temporal ta konta pa mucha ku tin mester di guia intensivo, komo konsekuensia di un malesa òf enfermedat. Por ehèmpel riba tereno di higiena korporal, limpiesa korporal, kome i bebe, mobilidat, komportashon i kuido médiko. Mayor- i mayornan di kriansa ku tin kustodia riba muchanan ku di promé di sèptèmber te ku 30 di novèmber 2023 tin òf ta kumpli 3 aña di edat (t/k 17 aña) i ku tin derechi riba kompensashon pa yu na Hulanda Karibense, por entregá un petishon.
Na Boneiru, e evaluashon médiko si un mucha tin mester di kuido intensivo ta sosedé via Sentro Akseso. Na Sint Eustatius esei ta sosodé via e Klínika di Prevenshon di GGD i na Saba via e departamento di salubridat públiko.Ta klasifiká ku e nesesidat di kuido ta intensivo, ora muchanan tin mester di kuido intensivo diario riba diferente tereno. Solamente den kaso di un evaluashon médiko positivo, unidat SZW di RCN lo por paga e kompensashon di 2.259 dòler. Esaki ta un montante bruto. Mayor- i mayornan di kriansa ku a risibí un konseho positivo den e periodo di petishon anterior (2022) i te ainda ta kumpli ku e kondishonnan pa kompensashon pa yu, no tin mester di hasi un petishon. Nan a risibí un karta tokante esaki i ta risibí e kompensashon na sèptèmber 2023 riba nan kuenta di banko.
Kon pa entregá petishon?
Por entregá petishon nobo for di promé di sèptèmber te ku 30 di novèmber 2023. Na Boneiru esaki por riba dianan di trabou entre 8 ’or di mainta i 4:30 ‘or di atardi na Sentro Akseso òf via meil aanvraagkindzorg@aksesobon.com. Na Sint Eustatius por entregá petishon pa medio di un sita na Prevention Clinic via e number di telefòn (+599) 318 2891. Na Saba por entregá petishon na departamento di Community Development, riba djaweps di 2 ’or te ku 4 ’or di atardi.
Mayor/mayornan di kriansa por akudí na e organisashonnan menshoná ariba pa e formulario i pa ayudo pa yena nan, pa pregunta tokante e evaluashon médiko i eventual guia pa kuido di e mucha. Tambe por haña tur informashon, e formulario di petishon i e kuestionario médiko online via www.rijksdienstcn.com.