Corona Smart: maksimal 50 persona, distansia sosial pa adulto i higiena ta importante

Entrante 6 di mei 2020 e Ordenansa di Emergensia COVID-19 nobo ku medidanan ‘Corona Smart’ ta na vigor. E prohibishon pa tur evento i aglomerashon di mas di 50 persona ta keda vigente, tambe na bichnan na Boneiru. Banda di esei tur adulto ta obligá pa tene 1,5 meter di distansia den lugánan públiko. Bou di e kondishonnan akí i ku instrukshonnan di higiena estrikto, mayoria fasilidat na Boneiru por habri atrobe.

corona smart

Ounke e chèns ta birando mas i mas chikitu, no por ekskluí kompletamente ku e vírùs  di corona ta na Boneiru. Teniendo na kuenta tambe e kapasidat limitá di kuido riba e isla, algun medida di emergensia ta keda nesesario pa prevení plamamentu deskontrolá di e coronavírùs. Asina por ehèmpel tin un prohibishon total ainda na vigor pa eventonan pa kua tin  mester di pèrmit. Tambe enkuentronan ku mas di 50 persona ta keda prohibí, den ambiente públiko i privá, tantu paden komo den aire liber.

Ademas tur hende den lugánan públiko i privá mester tene un distansia sosial di minimal 1.5 meter. Esaki no ta konta pa muchanan te ku 17 aña ku ta huntu ku otro i pa personanan ku ta biba na e mes adrès.

Kua establesimentunan ta habrí?

Fasilidatnan deportivo (inkluso lès di landamentu), establesimentunan di horeka i kasinonan tin mag di habri basta ku nan por tene nan mes na e máksimo di 50 persona, un distansia sosial di mínimo 1.5 meter i medidanan estrikto di higiena. Deporte di kontakto ta prohibí pa adultonan. Muchanan te ku 17 aña ora di hasi deporte nan ku nan, no tin mester di tene distansia sosial, nan tin mag di praktiká deporte di kontakto tambe. Torneonan grandi ta prohibí pa tur hende.

Entrante 11 di mei skolnan i akohida di mucha ta bolbe habri ku aplikashon di medidanan di higiena, no mas ku 50 persona pareu den un espasio (pafó) i un distansia sosial di mínimo 1.5 meter. Aki tambe distansia sosial no ta konta pa muchanan te ku 17 aña ku ta huntu, pa tur adulto si.

E medidanan di higiena ta preskribí pa e sekshon di Salubridat Públiko Boneiru. Ta bai por ehèmpel pa aplikashon adekuá i regular di higiena di man i di tosamentu, limpiamentu regular di superfisienan ku ta usa frekuentemente, aparatonan i ko’i hunga. Tambe tantu mucha komo adulto mester keda kas den kaso di komienso di síntomanan manera tosamentu, nistermentu, oumento di temperatura òf keintura.

Kiko ta keda será?

Klupnan di adulto i klupnan nokturno, sitionan di baile, spa- i sounanan ta keda será pasobra e riesgo di plamamentu dor di kontakto físiko den un espasio limitá ta grandi.

Aki por haña un resúmen mas amplio i e Ordenansa di emergensia kompleto.