Mi ta un empleado
Kiko ta kambia pa mi komo trahadó den e prolongashon di 13 di yüli te ku 12 di òktober 2021?
E prohibishon riba trabou ta kanselá. Esaki ta nifiká ku bo dunadó di trabou por pidi bo pa traha bèk, miéntras ku e ta keda risibí sosten pa pago di bo gastunan di salario.
E kompensashon di SZW ta mas abou ku mi salario regular. E dunadó di trabou mester paga e sobrá e mes?
E Kódigo Sivil (Burgerlijk Wetboek BES) ta ofresé dunadó di trabou espasio pa desviá di e punto di salida di pago kompleto di salario. Esaki por via un akuerdo por eskrito òf via reglamentu. Den kaso di un akuerdo, bo mester bai di akuerdo. Den kaso di reglamentu e ta un desishon unilateral di bo dunadó di trabou. (Bo por lesa esaki bèk den artíkulo 1614d, Burgerlijk Wetboek BES). Ta rekomendabel pa hiba kombersashon tokante esaki ku bo dunadó di trabou. Esei por kontribuí na komprenshon pa otro su posishon. SZW no tin tarea den esaki, paso aplikashon di Burgerlijk Wetboek BES ta den ámbito di lei di derechi privá.
SZW ta eksihí di bo dunadó di trabou ku e ta paga bo mínimalmente e montante ku e ta risibí di e kompensashon.
Mi dunadó di trabou por kita mi for di trabou pasobra e volúmen di benta ta baha?
Tambe durante di e prolongashon, e kondishonnan regular pa renunsia ta na vigor. Esei ta nifiká ku bo dunadó di trabou por hasi aplikashon pa retiro na unidat SZW di RCN òf serka un hues. Ora ta revisá e petishon pa retiro, ta mira e situashon spesífiko i ta tuma den konsiderashon ku tin areglonan di emergensia. Pues bo dunadó di trabou no por kita bo for di trabou sin mas pasó e volúmen di benta ta baha. Tambe e mester tin aprobashon di unidat SZW di RCN òf di un hues.
Si bo ta den bo temporada di prueba (‘proeftijd’) òf si bo kontrakt ta terminá, bo dunadó di trabou por laga bo bai. Den e kaso aki no ta trata di retiro. Si bo tin un kontrakt di sero ora, e dunadó di trabou por pone bo riba 0 ora. E ora ei tampoko no ta trata di retiro.
Mi tin derecho riba e areglo di emergensia di SZW si no prolongá mi kontrakt?
Posiblemente bo por apliká pa sosten komo èks empleado. Ta otorgá e sosten aki pa máksimalmente tres luna te ku 12 di òktober 2021. Ta posibel pa hasi un aplikashon si bo èks dunadó di trabou ta hasi uso di e areglo di emergensia di SZW i si bo pèrdida di trabou ta di lenk direktamente ku e medidanan rondó di e vírùs di corona.
Mi tin derechi riba e areglo di emergensia di SZW si mi tuma retiro boluntariamente?
Nò. Si bo mes bai di akuerdo ku terminashon di bo kontrato laboral, bo no por bini na remarke pa e areglo di emergensia.
Mi tin deber di informá tokante kambio?
Mester notifiká SZW di kambio importante, hasiendo uso di e formulario di kambio.
Suponiendo ku bo dunadó di trabou ta esun ku a apliká pa bo areglo di emergensia, e mester hasi esaki. Bo mester informá bo dunadó di trabou mesora si tin kosnan ku ta di importansia pa e areglo di emergensia.
Mi por sali for di Hulanda Karibense si mi ta kai bou di e areglo di emergensia i si mi dunadó di trabou ta permití esaki?
Punto di salida ta ku bo ta disponibel pa traha. Bo derechi riba e areglo di emergensia ta kaduká si bo ta permanesé pafó di Hulanda Karibense durante un total di kuater siman òf mas durante di e periodo ku e areglo ta na vigor.
Kiko mi mester hasi si durante e areglo di emergensia mi bira malu?
Informá bo dunadó di trabou riba e promé dia ku bo ta malu, manera ta kustumber. Bo dunadó di trabou no por hasi uso simultáneamente di e areglo di emergensia di SZW i e kompensashon pa pèrdida di salario pa bo. E mester tuma kontakto ku unidat SZW di RCN pa mira kiko ta e mihó opshon den bo situashon.