Interferensia

Ku wifi problema di spit i konekshon ta surgi prinsipalmente dor di e aktividat den aire. Den e settingnan di bo router skohe e kanal ku e kantidat di otro usuario mas abou. Mayoria di biaha tambe bo por laga bo router òf modem mes skohe e mihó kanal. Si tòg bo ta keda enkontrá problema ku bo wifi, nos ta konsehá pa tuma kontakto ku bo provider.

Bo router ta hasi uso di 2.4 GHz òf 5 GHz? E señal 5 GHz ta pasa dor di materialnan fiho ménos bon. Un kombinashon di tur dos banda di frekuensia hopi bia ta esun ku ta mas mihó. Routernan modèrno por hasi uso di tur dos banda.

Chèk si bo tin problema ku alkanse (coverage) na diferente lugá den bo kas. Murayanan di piedra i wayanan di koriente òf otro kabelnan por tapa e señal. Patras di e televishon tampoko no ta e lugá di mas mihó, ya ku esei por tin e mesun efekto.

Un lèptòp ku semper sa usa na un lugá fiho, tambe por konektá hopi bon ku un kabel di netwerk.

E uso di èkstra punto di akseso por yuda, pero aparato mal situá por empeorá e problema. No pone nan na un lugá kaminda nèt ta risibí señal ainda, sino yùist na un lugá kaminda e señal ta bon ainda. Un konekshon di kabel ta mas mihó ainda.

No opstante nos tepnan te ainda bo ta eksperensiá problema ku bo wifi? Konsultá ku bo provider e ora ei. RDI en prinsipio no ta trata ku interferensia di wifi. Pasobra e uso di e asina yamá frekuensianan sin outorisashon ta riba ‘NIB’, o sea ‘Non Interference Basis’. Esaki ta enserá ku boso mester akseptá interferensia di un i otro i boso mester hasi tur loke ta na boso alkanse pa prevení interferensia.

Promé ku bo kumpra un aparato semper wak si un aparato tin un marka CE òf FCC. Riba e aparato, riba e emboltura i den e dokumentashon (online) e ora ei tin pará e lèternan CE òf FCC. E ta nifiká ku e aparato ta kumpli ku rekisitonan. Esei ta mustra asina:

[ Afbeeldingen]

Despues kontrolá e frekuensianan riba kua e aparato ta traha. Esakinan ta indiká riba e aparato mes, riba e emboltura òf por lo ménos den e manual òf dokumentashon tékniko. No ta tur aparato ku un marka CE òf FCC por usa na Hulanda Karibense. Por ehèmpel e uso di e bandanan di frekuensia 868 – 873 MHz i 902 – 928 MHz no ta pèrmiti. Lesa mas aki.

Pa sierto aparatonan sí bo mester tin un outorisashon. Bo por pidi esaki serka RDI. Wak e página “Petishon outorisashon”. 

No usa aparatonan pa un otro propósito ku esun deskribí den e manual. Pues no usa un dimmer pa aparato ku no por dim, manera lampi led.

I mantené e instrukshonnan di instalashon. Serka por ehèmpel pènel solar un bon instalashon ta di importansia krusial.

Kasi semper interferensia riba frekuensianan liber di outorisashon ta kousa di interferensia entre aparatonan den mesun banda di frekuensia. Pues ta nesesario pa haña e aparato ku ta kousa e interferensia i despues diskutí ku e doño si tin un solushon. Un kousa ku hopi bia ta trese interferensia ta ku e baterianan den e aparato ta kasi bashí.

P’esei ora di interferensia semper investigá den e propio besindario si tin un otro aparato ku ta kousa e interferensia. Bo ta hasi esaki dor di saka e stèker òf e baterianan pa un mínimo di un minüt for di un otro aparato. Wak despues si e ta kondusí na un mehorashon. Asina bo por hasi esaki ku tur aplikashon wireless, te ora bo haña e fuente ku ta stroba.

Si bo no haña e fuente di e interferensia, e ora ei nos ta konsehá bo pa hiba un kombersashon ku bo bisiñanan. Por lo general bisiñanan tin e mesun problema i pues tin un interés komun pa resolvé e interferensia.

En prinsipio RDI no ta trata mèldu di interferensia pa loke ta trata frekuensianan liber di outorisashon. Pasobra e uso di e frekuensianan aki ta riba ‘NIB’, òf ‘Non Interference Basis’. Esaki ta enserá ku bo mester akseptá interferensia di un ke otro i bo mester hasi tur loke ta na bo alkanse pa prevení interferensia.

Pero si un interferensia produsí un problema sosial, e ora ei e RDI por disidí tòg pa hasi un investigashon. Esaki ta kasonan eksepshonal, manera un interferensia pa motibu di kua habitantenan di un bario kompleto no por habri porta di nan outo mas. Si dado kaso un interferensia produsí un problema sosial, e ora ei bo por mèldu un interferensia serka RDI. Pa e motibu ei usa e formulario di notifikashon.

Mas i mas, den kasnan di famia ta hasi uso di lampinan led. Pero bo a para ketu tambe na e echo ku yùist e lampinan led pa spar energia ei por ta e kousa di e interferensia riba bo televishon? 

Ora di kambia pera di lus òf lampi halogeen paga tinu na asuntu manera voltahe, kapasidat i e sòket.

Tin sierto lampi ku bo por dim, por ehèmpel pa spar energia òf haña sierto ambiente den kas. Ora bo kambia un lampi halogeen pa un lampi led, sin ademas kambia e dimmer tambe, por sosodé ku e lampi led ta sende paga òf zum. Un dimmer inapropiá ademas por kousa interferensia den kas, por ehèmpel riba bo tv, radio òf wifi. Fuera di esei por ta asina ku sin ripará bo ta kousa interferensia na servisionan di asistensia.

Riba e emboltura tin pará si ta posibel pa dim bo lampi (pues no ta tur lampi led por dim). Si bo por dim bo lampi, kumpra un dimmer di led spesial pa bo lampi e ora ei. E bendedó di e lampi por bisa bo kua dimmer bo mester.

Lesa e informashon tokante pènelnan solar riba e wèpsait di RDI (na hulandes).

Pèrkurá tambe pa bo aparatonan ta bon sigurá digitalmente, asina ku hacker no ta haña chèns. Aki bou tin un kantidat di tep práktiko pa sigurá bo aparatonan:

• Lesa reseña di produkto promé ku e kompra (online). Tambe semper lesa e kondishonnan pa usuario i e deklarashon di privasidat di e fabrikante. Asina bo por mira si e kompania a duna atenshon na e seguridat digital di e produkto.

• Buska online si ta konosí ku bo aparato tin riesgo di seguridat i tepnan spesífiko pa hasi bo aparato mas seif.
• Regularmente hasi update (di seguridat) na bo aparatonan. Riba e wèpsait di e suministradó bo por haña sa si tin update disponibel. Tin bia aparatonan ta hasi update nan so, tin bia bo mester hasi esaki na man.
• Skohe un password fuerte pa kada aparato (un mínimo di 12 señal ku lèter, sifra i señalnan spesial). Nunka usa mesun password pa diferente aplikashon.
• Skohe pa verifikashon den dos paso ora esei ta posibel. Esaki ta un seguridat èkstra ku kua ta kontrolá si ta abo ta esun ku ta log in. Por ehèmpel un kódigo di sms ku bo mester yena èkstra ora di log in.
• Kompartí ménos informashon (privá) posibel ku e aparato. Por ehèmpel, no yena e fèltnan ku no ta obligatorio.
• No ta nesesario pa inkorporá e aparato den bo netwerk di kas? No hasié e ora ei.
• Paga e aparatonan ku ta konektá ku e netwerk ora bo no ta usa nan pa hopi tempu.
• Wak riba bo router / modem si e opshon ‘universal plug i play’ (UPnP) ta pagá. UPnP ta pèrkurá ku software riba bo PC, i appnan riba bo telefòn móbil por adaptá e konfigurashonnan di bo router. Hèndi tin bia, pero no masha seif. Riba e wèpsait òf via e manual di usuario di bo router tin pará kon bo por paga UPnP.
• Wak den e manual di e aparato pa verifiká si tin mas medida di seguridat ku ta ofresé.