Tin diferente wèpsait ku ta ofresé AIS (Automatic Identification System, Sistema pa Identifikashon Outomátiko) pa dato di barku, ku por usa pa konsultá datonan aktual i históriko tokante posishon i moveshon di barku. Algun wèpsait popular por ehèmpel ta MarineTraffic, FleetMon, VesselFinder, i Vesseltracker.

Wèpsaitnan asina ta basa nan informashon riba e datonan ku AIS-transponder (emisornan AIS, sistema pa identifikashon outomátiko) di barkunan ta transmití via un señal di radio. Asina, barkunan por mira informashon èkstra di otro riba un mapa elektróniko òf un pantaya di radar. A reservá dos kanal pa esei riba e banda di radio marítimo. Satélite i basenan di resepshon na tera ta manda e datonan aki via internet pa e wèpsaitnan.

Pa bapor grandi di laman un AID-transponder asina ta obligatorio, otro barkunan por skohe si nan ke tin unu na bordo.

AIS-transponder ta transmití algun dato fiho i variabel di e barku, ku ta importante pa nabegashon seif (por ehèmpel: kódigo di identifikashon, nòmber di e barku, su midínan, rumbo, i spit). E kódigo di identifikashon ku ta hasi uso di dje ta e number MMSI. Pa Boneiru, Sint Eustatius i Saba, RDI ta asigná e number aki den e outorisashon di radio di barku òf Ship Station Licence.

E number MMSI ta konsistí di 9 sifra, e promé tres di kua ta forma e kódigo di e pais. Den e kaso di e islanan Boneiru, Sint Eustatius i Saba, e kódigo di pais ta 306. E kódigo di pais aki ta e kódigo original ku a asigná na Antia Hulandes (sin Aruba). Komo ku e kantidat di number disponibel ta skars, e Unidat Internashonal di Telekomunikashon no tabata ke asigná kódigo di pais nobo, a dividí e seri 306 entre Kòrsou, Sint Maarten i Hulanda Karibense (e islanan BES).

Kódigo di pais CW

RDI tin biaha ta haña pregunta tokante barku di Boneiru, Sint Eustatius i Saba ku riba wèpsaitnan di trasa ku AIS ta visibel komo prosedente di Kòrsou (CW) komo estado di registrashon di e barku.

Den e añanan ku ta tras di lomba, RDI a manda diferente meil pa diferente wèpsait ku e petishon pa adaptá esaki, i pa laga e pais di registrashon di e barku dependé di e kombinashon di number MMSI i señal di yamada, sinembargo sin éksito. E lista ofisial di kódigo di pais por haña aki.

Otro identifikashonnan di AIS

Tambe tin otro basenan di AIS ku por rekonosé na e format diferente di e numbernan MMSI (MID ta e kódigo di pais, X ta un sifra entre 0 i 9):

  • 00MIDXXXX: Basenan na tera, manera por ehèmpel e basenan di radar di wardakosta;
  • 99MIDXXXX: Medionan pa asistí ku Nabegashon (AtoN), opstákulo den laman, manera mulina di bientu, bui i bapor kibrá;
  • 111MIDXXX: Avion di Búskeda i Reskate.