Dispensashon parsial

Kondishonnan

Pa bini na remarke pa dispensashon parsial, tin dos kondishon:

• Diploma: bo mester a optené un diploma pa e estudio pa kua bo a risibí un fiansa di FINEB;
• Relashon di trabou: bo mester ta traha (tabata traha) serka un servisio di gobièrnu nashonal (insular), un fundashon, un nv òf den sektor privá. Tambe si bo ta òf tabata empresario independiente, trahadó yamá òf trahadó freelance, bo por bini na remarke pa e dispensashon parsial.

Bo no ta kumpli ku e dos kondishonnan aki?  E ora ei bo no ta bini na remarke pa dispensashon parsial di bo debe di estudio.

Suma di e dispensashon

E suma máksimo ku por wòrdu dispensá ta un tersera parti di e Suma prinsipal. Pa studiantenan ku a studia na Hulanda ta konta ku si den kasonan individual un dedukshon máksimo di $ 1.118,- ta mas faborabel, RCN-Studiefinanciering  ta usa e dedukshon aki.

Kantidat di luna ku a traha

Pa bini na remarke pa e dispensashon máksimo, bo mester a traha sinku aña òf mas na Boneiru, Saba, Sint Eustatius, Kòrsou òf Sint Maarten. Bo a traha ménos ku sinku aña (60 luna)? E ora ei e dispensashon pa bo, lo ta na proporshon di e lunanan ku bo a traha.

Ehemplo: Bo a traha 2 aña i mei (30 luna) na Saba i a risibí $ 5.000,- na suma prinsipal. E ora ei bo tin derechi riba e mitar (30/60) di e dispensashon máksimo: 30/60*1/3*$ 5.000= $ 833,-. 

Studiantenan di LOFO

Pa studiantenan di LOFO un kantidat di regla diferente ta konta:

• Un studiante di LOFO ku a traha sinku aña òf mas, ta bini na remarke pa un dispensashon máksimo di 40% di e Suma prinsipal. Tambe no ta kobra interes riba e fiansa total;
• Pa un studiante di LOFO ku a traha ménos ku 5 aña, e dispensashon ta na proporshon di e kantidat di luna trahá. Den e kaso ei, si ta kobra interes riba e fiansa total!

Hasi petishon pa dispensashon parsial

Bo por hasi un petishon pa un dispensashon ku e formulario Hasi petishon pa dispensashon parsial fiansa di FINEB. Ku e formulario aki bo mester manda e pruebanan for di kua ta sali na kla den kua periodo(nan) bo ta (a) traha. Pruebanan ta por ehemplo, kopianan di e kontrato di trabou, deklarashonnan di bo doño di trabou i spesifikashonnan di salario. Tambe bo mester manda un kopia di e diploma pa kua bo a haña e fiansa di FINEB. Bo a manda insufisiente prueba pa un kantidat di luna? E ora ei RCN-Studiefinanciering lo saka 3 luna for di e kalkulashon di e dispensashon!