Deklarashon di Atmishon Legal

Pa ken e formulario aki ta?

Merikano, Hulandes Oropeo i Hulandes for di Kòrsou, Sint Maarten òf Aruba ku ke biba mas ku 180 dia pa kada 365 dia na Boneiru, Sint Eustatius òf Saba òf ke biba i traha òf kore stazje durante nan estadia pa mas ku 90 dia pa kada 365 dia.

Di kon e formulario aki?

Ku e formulario aki bo por hasi un petishon pa un Deklarashon di Atmishon Legal (artíkulo 3 Wet Toelating en Uitzetting-BES) (Lei di Atmishon i Ekspulshon-BES).

Kua anekso mi mester agregá?

Banda di e formulario, bo mester entregá otro dokumentonan tambe i paga pa agregá tur kos. Solamente petishonnan kompleto ta tuma den tratamentu.

Unda mi ta entregá mi petishon?

Bo por entregá bo petishon en persona na un di lokètnan di e IND-Unidat Hulanda Karibense. Pa esaki mester traha un sita (na tempu). Wak riba e página di kontakto, pa datonan di kontakto i oranan di apertura di tur ofisina di IND.

Bo tin nashonalidat hulandes? E ora ei bo por hasi petishon ònlain tambe.

Kiko ta pasa ku mi petishon?

Si bo a entregá bo petishon serka un di e lokètnan di e IND-Unidat Hulanda Karibense i bo petishon ta kompleto, bo petishon ta wòrdu tuma den tratamentu. Si bo petishon no ta kompleto, esaki no por wòrdu evaluá. Lo bo haña mensahe por eskrito ora a tuma un desishon riba bo petishon. Tene kuenta ku un término di tratamentu di máksimo seis luna pa esei. IND ta aspirá pa terminá ku un petishon dentro di dos luna.

Kiko si mi petishon a wòrdu aprobá?

Si bo petishon pa Deklarashon di Atmishon Legal a wòrdu aprobá, bo mester registrá bo mes na e departamentu di Asuntunan Sivil (burgerzaken) den e atministrashon básiko. Esaki ta obligatorio. Ora bo a registrá bo mes, e departamentu di Asuntunan Sivil ta traha un prueba di identifikashon (sédula) pa bo.

Klek aki pa mas informashon tokante e departamentu Sivil di Boneiru, Saba i Sint Eustatius. Paga tinu: bo ta sali for di e wèpsait di e Rijksdienst Caribisch Nederland.

Download e formulario ‘Deklarashon di Atmishon Legal'

Si mi ke bini pa stazje?

Informashon tokante kore stazje na Hulanda Karibense, bo por mira riba e pagina aki.

Paga tinu! Deklarashon di kondukta (VOG)

Personanan ku tabata biba den Estádos Unídos mester entregá un Deklarashon di Kondukta (VOG), emití pa e Departamento di Hustisia di Estádos Unídos (parti di e Departamento di Investigashon Federal). Pa e VOG aki ta hasi un chekeo nashonal. E VOG mester tin un apostille. Un VOG ku a wòrdu emití dor di un siudat òf estado no ta wòrdu aseptá. E VOG e/òf e apostille na momentu di e petishon mester ta no mas ku tres luna bieu.  

Riba 8 di desèmber 2017, Prokurador General di Kòrsou, Sint Maarten, Boneiru, Sint Eustatius i Saba, Gezaghèber interino di Boneiru i Gerente Sustituto di unidat IND Hulanda Karibense a firma un akuerdo.
Esaki a resultá den un proseso di aplikashon mas efisiente pa ekstenshon di un pèrmit di estadia, aplikashon pa pèrmit di estadia indefiní, òf aplikashon pa optené nashonalidat Hulandes. For di promé di yanüari 2018 e proseso ta kana direktamente entre IND Hulanda Karibense i Parkèt di Prokurador General. Esaki ta nifiká ku pa aplikashonnan menshoná aki riba, e siudadano no mester pidi deklarashon di bon kondukta (VOG) mas na Gabinete di Gezaghèber.

Entrante 1-1-2019, personanan ku ta bin biba na Hulanda Karibense i ku den e último sinku añanan a biba solamente na Kòrsou, Hulanda Karibense, Sint Maarten òf Hulanda Oropeo, no mester entregá un VOG pa petishon di deklarashon di atmishon legal.
IND mes lo pidi e dokumentu aki ofisialmente. E dokumentu mester indiká ku bo tin bon kondukto i bo mester firma e deklarashon di antesedente den e formulario di aplikashon.
Si den e último 5 añanan bo a biba pafó di Reino Hulandes òf den Aruba, bo mester entregá un VOG, ku apostille òf legalisashon.

Mas informashon tokante e VOG, bo por haña riba e wèpsait di Justis, un parti di e Ministerio di Hustisia.