Lei marítimo pa maneho BES

Bo kier konstruí un ‘steiger’ pa mara barku? Òf ekspandé bo playa? E ora ei bo mester pidi un pèrmit serka Rijkswaterstaat na Hulanda a base di e Lei di maneho marítimo BES. Riba e páginanan aki bo ta lesa kiko ta stipulá den e lei aki, kiko esaki ta nifiká pa bo, i pa kua aktividat bo mester pidi un pèrmit.

Tokante e Lei di maneho marítimo BES

For di 10 di òktober 2010 Bonaire, Sint Eustatius i Saba ta forma parti di e konstelashon estatal hulandes. Pa e motibu ei e tareanan di Reino pa e islanan aki ta kai bou di e responsabilidat ministerial hulandes.

Pa e maneho di e awanan rondó di Bonaire, Sint Eustatius i Saba e Lei di maneho marítimo BES a drenta na vigor riba 10 di òktober 2010, i e ta remplasá e Ordenansa nashonal di maneho marítimo. No a kambia e ordenansanan insular.

Pakiko un lei pa maneho marítimo?

E awanan di laman rondó di Bonaire, Sint Eustatius i Saba ta di sumo importansia pa e islanan for di punto di bista ekonómiko. Pensa den e kuadro aki riba e turismo di sambuya i turismo eko, pero tambe riba peska i nabegashon.

Rijkswaterstaat

Den e Lei di maneho marítimo BES a regla pa e minister di Infrastruktura i Medioambiente ta responsabel pa e maneho di e laman rondó di Hulanda Karibense. Rijkswaterstaat ta e organisashon di ehekushon di e minister hulandes di Infrastruktura i Medioambiente i e instansia aki ta ehekutá e lei. Rijkswaterstaat ta pèrkurá pa un tráfiko marítimo rápido i seif, awa limpi i seguridat di awa.

Kiko ta stipulá den e Lei di maneho marítimo BES?

Den e Lei di maneho marítimo BES a stipulá regla pa aktividat den òf na laman, ku por influenshá:

E seguridat di e nabegashon i e tráfiko riba laman
E bida di matanan i bestianan den laman
E medioambiente i naturalesa di e kosta i lamannan
E herensia marítimo arkeológiko den laman
Polushon di laman

Mantenshon di órden públiko

Rijkswaterstaat ta supervisá kumplimentu ku e Lei di maneho marítimo BES i e obligashonnan stipulá den esaki (mandamentunan, prohibishonnan, obligashonnan di notifikashon). Ademas e ta kontrolá e preskripshonnan den e pèrmitnan ku a keda otorgá. Esaki ta tuma lugá tantu pa medio di inspekshon anunsiá, komo pa inspekshon no anunsiá. Den e kuadro aki Rijkswaterstaat ta traha huntu ku e gobièrnunan lokal. Tambe Rijkswaterstaat ta evaluá notifikashonnan di infrakshonnan ku ta drenta.

Na momentu ku un aktividat òf konstrukshon no ta di akuerdo ku e Lei di maneho marítimo BES, Rijkswaterstaat por prosedé ku akshonnan pa mantené órden públiko (duna but, para e trabou, etcetera).

Bo kier sa mas tokante mantenshon di órden públiko? E ora ei manda un e-mail pa Rijkswaterstaat:
E-mail: vv-hh-cn@rws.nl

Òf lokalmente ku Rijksdienst Caribisch Nederland
Telefòn: +599 715 8333
E-mail: info@rijksdienstcn.com