Skohe bo propio provedor di Kuido

Esaki ta enserá si bo skohe pa un provedor di kuido diferente ku esun na kua bo a keda referí pa bo dòkter di kas, spesialista òf dentista, Artíkulo 10, insiso 4 di e Dekreto di seguro di kuido BES (Besluit zorgverzekering BES) ta aplikabel. 

Si bo risibí pèrmit di ZJCN pa haña kuido di un provedor di kuido ku no tin kontrakt ku ZJCN, bo por pidi kompensashon pa tur òf parti di e gastunan médiko aki. Mester haña aprobashon pa esaki promé ku e tratamentu tuma lugá. Petishonnan ku a tuma lugá despues di tratamentu lo no ta atmisibel. Tambe, ZJCN por rechasá bo petishon. P’esei bo tin ku sigurá bo mes ku bo tin aprobashon di ZJCN promé ku bo tratamentu tuma lugá. Sin tin sufisiente otro provedor nan di kuido disponibel ku por hasi e tipo di kuido aki, i basá riba indikadónan manera kalidat i efisiensia, ku tin un akuerdo ku nos, ZJCN por rechasá bo petishon.

Bo mester paga e gastunan médiko di antemano, i despues entregá e faktura di e provedor di kuido na ZJCN. ZJCN lo kontrolá e faktura, di kua despues lo bo haña tur òf parti di e montante bèk. ZJCN lo no paga e faktura dirèkt na e provedor di kuido. Dor di evaluá e provedor di kuido riba sierto indikadó di kalidat, por haña informashon tokante e kalidat i efisiensia di e kuido brindá. Lo inkluí e informashon aki den e kompra di kuido, kaminda no ta ekskluí kompra selektivo.

E dòkter di kas òf spesialista mester entregá e petishon. Pa esaki, mester entregá e siguiente dokumentonan:

• Deklarashon médiko di e persona ku a hasi e referensia (dòkter di kas òf spesialista)
• oferta di e provedor di kuido ku no tin kontrakt ku ZJCN, ku e deskripshon eksakto di e tratamentu i e gastunan total di esaki
• Deklarashon di aprobashon di asegurado firmá

Lo no prosesá petishonnan inkompleto.

Kuadro hurídiko

E kuadro hurídiko ta wòrdu forma pa e Dekreto di seguro di kuido BES (Besluit zorgverzekering BES) i e Areglo di derechi ariba seguro di kuido BES (Regeling aanspraken zorgverzekering BES). A base di esaki por garantisá ku aseguradonan por risibí kuido ‘in natura’, te asina leu ku por ofresé e kuido aki di forma rasonabel riba e islanan. Pa hasi esaki posibel, ZJCN ta sera kombenio ku dunadónan di kuido ku ta bini na remarke pa esaki. 

Punto di salida ta keda ku aseguradonan mester akudí na dunadónan di kuido ku tin un kombenio ku ZJCN (artíkulo 10, insiso 2 di e Dekreto di seguro di kuido BES).

Den e dekreto tin stipulá tambe ku aseguradonan por akudí na dunadónan di kuido no kontratá, tantu riba e isla unda nan ta biba, komo den eksterior. Esaki ta posibel segun artíkulo 10, insiso 4 di e Dekreto. Ku permit previo di ZJCN, e asegurado por akudí na un dunadó di kuido no kontratá i por hasi apelashon riba kompensashon parsial o kompleto di e gastunan ku el a hasi pa e kuido médiko ku el a risibí.