Kon Schadefonds ta trata mi petishon?

Ora Schadefonds risibí bo petishon, ta wak promé si tur informashon ku ta nesesario pa tuma bo petishon den tratamentu, ta kompleto. Despues bo ta haña un e-mail den kua ta pará ku Schadefonds a risibí bo formulario.

Kontakto telefóniko
E kontakto entre Schadefonds i e víktima en prinsipio lo kana via Ofisina Yudansa pa Víktima. Huntu lo evaluá tambe si ainda informashon adishonal ta nesesario, por ehèmpel di polis, bo dòkter òf terapista. Si e petishon ta eksihí esaki, Schadefonds por tuma kontakto ku bo via telefòn òf e-mail tambe. 

E tratamentu
Ora Schadefonds tin tur dokumento, un hurista di Schadefonds ta tuma bo petishon den tratamentu. E ta evaluá si bo ta kumpli ku e kondishonnan pa un pago. E persona aki tambe ta determiná e altura di e pago.

E desishon
Schadefonds ta trata di tuma un desishon mas lihé ku ta posibel, pero ta hasi esaki pa mas tardá denter di 26 siman. Si bo a entregá e petishon via Ofisina Yudansa pa Víktima, Schadefonds ta manda e desishon pa Ofisina Yudansa pa Víktima, ku despues ta tuma kontakto ku bo pa pasa tuma e desishon serka nan.

Bo a entregá e petishon independientemente? E ora ei bo ta risibí e desishon via pòst òf via e-mail.

E pago
Si bo ta haña un suma di sèn, Schadefonds ta depositá e suma aki denter di 30 dia despues di a manda e karta, riba e number di kuenta ku bo a duna. Paga tinu! Si bo risibí mas sèn for di por ehèmpel un seguro òf di e malechor despues di bo pago di Schadefonds, e ora ei bo mester mèldu esaki na Schadefonds. Ta fiha e pagonan den Euro i lo buk nan riba bo kuenta den US dòler. E suma ku finalmente ta subi bo kuenta pa e motibu ei ta dependé di e tipo di kambio.