Un denunsia ta nesesario pa un pago di Schadefonds?

Nò, un denunsia no semper ta nesesario pa un pago di Schadefonds. Si bo no a hasi denunsia, loke a sosodé mester sali na kla sí for di otro dokumentonan. Tin biaha un mèldu serka polis òf un rapòrt di Voogdijraad por ta sufisiente. Den esaki mester tin sufisiente informashon sí tokante e delito, e motibu i e sirkunstansianan.

Schadefonds tin mester di informashon konfiabel di un hende ku no tabata envolví den loke a tuma lugá. Loke en todo kaso no ta sufisiente ta:

• solamente un deklarashon propio di e víktima
• deklarashonnan di testigu duná basta tempu despues di e suseso i/òf no serka polis
• solamente informashon médiko, pasobra den esaki no tin pará kiko tabata e motibu di e delito òf bou di kua sirkunstansianan el a tuma lugá. Den esaki tambe ta pará solamente kiko e víktima a konta e dunadó di tratamentu, esaki no ta sufisiente pa nos evaluashon.