Preguntanan hopi hasí

E number di servisio pa siudadano (BSN) ta un number úniko i personal di  9 sifra, i e ta konektá na bo datonan personal. Hopi biaha ta abrevi’é komo BSN. E ta un number importante ku ta yuda bo regla asuntu ku instansianan di gobièrnu fásilmente.

Introdukshon di e BSN ta un promé paso den direkshon di mihó servisio di gobièrnu na Boneiru, Sint Eustatius i Saba. Na e balinan i online. Pa den futuro tambe por regla asuntu seif online ku instansianan di gobièrnu na Hulanda Karibense, bo tin mester di un BSN. Ku un BSN bo por hasi petishon pa e medio di log in DigiD. Ku e numbernan personal ku awor ta den uso na Hulanda Karibense, manera e number di ID i e number di CRIB, esei no ta posibel. P’esei tur hende ta haña ún number personal úniko pa henter gobièrnu.

Tur hende ku ta inskribí den e atministrashon di poblashon di e Entidat Públiko di Boneiru, Sint Eustatius i Saba, ta haña un BSN. Tur habitante nobo di e Entidat Públiko tambe ta haña un BSN ora di inskribí.

Lo introdusí e BSN na aña 2025. E ekspektativa ta ku tur hende lo haña un BSN den e di dos mitar di 2025. Esaki ta bira posibel despues ku a adaptá e leinan.

Nò, bo no ta haña un BSN nobo. E BSN ku bo tin, lo sigui ta di bo. Un hende por tin solamente ún BSN.

Sí. Despues di introdukshon di e number di BSN nobo, e number di ID i e number di CRIB ta sigui den uso. E number di IDta keda den uso ainda pa e añanan benidero. Pues temporalmente lo bo sigui ku bo number di ID, manera bo tin kustumber.

E BSN ta un number personal sin informashon personal. Den e number di ID a inkluí bo fecha di nasementu, loke ta indeseabel a base di protekshon di bo datonan personal. E number di CRIB ta e number ku Ofisina di Impuesto Hulanda Karibense ta usa. Ku un BSN bo por hasi un petishon pa e medio di log in DigiD. Fuera di esei, bo por usa e BSN tambe durante bo kontakto ku instansianan di gobiérnu i organisashonnan na Hulanda Oropeo. Ku e number di ID i e number di CRIB esei no ta posibel.

Na aña 2025 bo por rekohé e karta BSN durante e simannan di rekohé BSN. Unda i ki ora esaki ta posibel, lo bo haña sa mas lat e aña aki. Bo ta risibí e karta di e Entidat Públiko unda bo ta inskribí. Habitante ku tin un BSN kaba, ta tene e mesun number i nan tambe por rekohé un karta.

E BSN ta bo number personal. Warda e number bon i no kompartié ku otronan. 

Ora bo a pèrdè bo BSN òf bo no ta kòrd’é mas, bo por pidié na bali serka Registro Sivil di e Entidat Públiko na bo isla. Ku un DigiD bo por buska e number online tambe via Mijnoverheid: MijnOverheid.

E BSN na promé lugá ta destiná pa kontakto entre habitantenan i instansianan di gobièrnu i entre instansianan di gobièrnu. P’esei, tur e instansianan di gobièrnu na Hulanda Karibense i Hulanda Oropeo por hasi uso di bo BSN. Asina lei ta bisa. Organisashonnan pafó di instansianan di gobièrnu awor ainda no por hasi uso di e BSN. No a stipulá esei ainda den lei. Aki ta trata por ehèmpel di organisashonnan den kuido i den enseñansa manera hospital, dòkter di kas, botika i skol.

Instansianan di gobièrnu ta hasi uso di e BSN por ehèmpel den prosesamentu di datonan personal. E BSN ta duna gobièrnu seguridat tokante identidat di un persona i e ta hasi interkambio di dato entre instansianan di gobièrnu posibel. P’esei un number personal mester ta úniko i personal.

Ku un DigiD bo ta demostrá online ken bo ta ora bo log in riba wèpsaitnan di instansianan di gobièrnu. E ta un medio di log in seif ku kua bo por regla asuntu online ku instansianan di gobièrnu fásilmente.  

Sí, bo por hasi un petishon pa un DigiD ku un BSN. Esei ta posibel online, via www.digid.nl/buitenland.

Nò, bo no por usa bo DigiD tur kaminda mesora. E gobièrnunan di Boneiru, Sint Eustatius i Saba ainda no ta konektá riba DigiD. Promé mester adaptá e sistemanan p’esaki. Esei ta tuma tempu. E gobièrnunan den Hulanda Karibense ta konektá un pia un pia riba e DigiD, di moda ku den futuro mas i mas frekuentemente bo por hasi uso di servisionan online. Sí por hasi uso di e DigiD mesora serka gobièrnunan i organisashonnan na Hulanda Oropeo ku ta konektá riba DigiD.

Sí, lo inskribí tur hende ku haña un BSN den e BRP (registrashon básiko di dato personal). E inskripshon ei ta nesesario pa haña un BSN. E inskripshon den e BRP no ta remplasá e inskripshon den e atministrashon di poblashon di Boneiru, Sint Eustatius i Saba.

Lo no pone e BSN riba e tarhetanan di identidat (sédula) nobo. A skohe pa esaki pa asina tin ménos riesgo ku organisashonnan ku no tin derecho di prosesá e BSN òf bo datonan personal hasi uso di e BSN. Lo pone e BSN sí riba pasportnan nobo.

Nò, habitantenan di Aruba, Kòrsou i Sint Maarten no ta haña un BSN. Esakinan ta paisnan independiente den e Reino. Boneiru, Sint Eustatius i Saba komo entidatnan públiko (munisipio spesial) ta forma parti di Hulanda. Esaki ta nifiká ku e legislashon ku ta adaptando awor, no ta bai konta pa e paisnan.